College-ah ruihhlo chungchang inzirtir

Mizoram State Legal Services Authority (MSLSA) chuan nimin khan Kolasib College-ah damdawi hman sual venna leh ruihhlo ngaite enkawl chungchang zirhona an buatsaih a; MSLSA member secretary R Vanlalena'n a hmanpui.

Awareneness Campaign on Prevention and Rehabilitation of Drug Abuse hi Kolasib District Legal Services Authority secretary Cacy Malsawmtluangi'n a kaihruai a; khuallian R Vanlalena chuan, Mizoramah ruihhloin bu a khuar mek tih sawiin, "Ṭhalaite kan harh chhuah a ngai. Nakin lawka kan ram hruaitu turte an nih avangin thisen far tàwp thleng pawhin kan bei tur a ni," a ti.

Damdawi hman sual vênna leh ruihhlo ngaite enkawl chungchang sawitu (resource person) Dr Lalthanzami, Kolasib OST Centre-a medical officer chuan, ruih theih thil tih ṭhat lohzia te, ruihhloin mihring nun a nghawng dan te, ruihhlo ti lo tura invên dan te, ruihhlo ngaite enkawl dante zirlaite a zirtir. Kolasib College vice principal Lalṭanpuia Rengsi-in thu a sawi bawk.

MSLSA Member Secretary hian nimin vek khan Kolasib District Jail a tlawh a, jail-a tângte chu an dinhmun leh harsatnate a sawipui. Kolasib District Jail-ah hian táng mi 100 an awm mek a ni.