District-ah inthlan atan inbuatsaih
Nimin khan Siaha, Kolasib, Lawngtlai leh Khawzawlahte kumina Legislative Assembly inthlanpui atana inbuatsaih atan thil chi hrang hrang tih a ni.
Siaha District Media Certification & Monitoring Committee (MCMC), Social Media leh Media Cell chu nimin khan additional DC mawhphurhna la mektu Rochuangkimi Khenglawt kaihhruaiin DC Conference Room-ah an thukhawm a; Assembly inthlanpui laia inthlan kaihhnawih advertisement rate hman tur leh pawimawh dangte an ngaihtuah. Siahaa cable TV network pahnih - New Skylink Vision leh HS Vision tea advertisement rate an bituk a; video ni khata vawi nga chhuakah thla khat atan Rs 12,000 leh scroll atan ni khatah Rs 500 an bithliah a ni.
Kolasib District Election Officer (DEO) chuan nimin khan MLA inthlanpui neih tura inpuahchahna atan electronic voting machine hman dan inzirtirna tura vote thlak chhinna ‘EVM Demonstration Van’ a vailiam. EVM van hian Kolasib district-a polling station 89 a tlawh chhuak dawn a ni.
Lawngtlaiah nimin khan deputy district election officer Abraham Beirazi Khithie hoin a pisaah MLA inthlanpui neih tura hman tur Second Special Summary Revision of Electoral Roll chungchang sawiho a ni a; Lawngtlai district-a political party, tlawmngai pawl leh kohhran hrang hrang hruaitute leh chanchinbu mite an tel. MLA inthlana hman tur electoral roll siam thar turah thun, paih leh siamṭhat ngaite tihfel nan August thla chhung hun hawn a ni a, final electoral roll chu October 4, 2023-ah tlangzarh a ni ang.
Nimin vek khan Khawzawl additional DC Lalfakzuala kaihhruaiin DC conference hall-ah inthlanpui neih tura sector officer leh sector police officer 10-te pualin training buatsaih a ni a; inthlan hma, inthlan ni leh inthlan zawha an mawhphurhnate mithiamte'n an zirtir. Khawzawl district-ah hian Tuichang MLA bial a awm a, polling station 28 a awm a ni.
Hnahthial DEO pawhin tun hnai khan South Tuipui Assembly constituency chhung - Tarpho, Khawhri, Cherhlun, Ngharchhip, New Ngharchhip, Thingsai leh Bualpui H khuaa polling station-te endik a ni a, EVM hman dan inzirtir nghal a ni bawk.