KHAWTHLIR

Report tlangzarh

'Progressive Mizoram: Presents new vistas of opportunities 2018-19 to 2022-23' tih thupui hmanga zirchianna report chu nimin khan MSME EPC chairman Dr DS Rawat-in a tlangzarh. DS Rawat chuan, kum nga chhungin Mizoramah mi 30,000 vel hna thawh tur remchang siam a nih thu leh project hrang hrangte a zawh hunah chuan mi 50,000 dangte hna thawh tur remchang a awm dawn thu a sawi.

Kawng hawng

Deputy chief minister Tawnluia chuan nimin khan Chanmari-ah Ramlai Road siam thar a hawng a, "Chaltlang Dingdi Veng thlenga tlang chhoh theih nan kawng kan zawng zel ang," a ti. Ramlai Road-ah hian two wheeler an tlân thei ṭhin a, cheng nuai 120 sêngin a bul hnaia mimal ram lei a nih hnuah cheng nuai 30 sêngin V Biaknghinglova'n lirthei ke pali nei tlân theih turin kawng a siam a ni.

Sarâng endik

Lunglei District Enforcement Squad for Single Use Plastic Free chuan nimin khan Lunglei Chanmari-a dawr 70-ah hman khaih daih sarâng hmang leh zuar an awm leh awm loh an endik a, dawr tam zawkah an hmang/zuar tih an hmu. Sarâng hmang/zuartute chu hmang/zuar nawn tawh lo turin an hriattir a ni.

ZPM Thalaiin MP Vena thláwp

ZPM Ṭhalai chuan thuchhuah sianin, Rajya Sabha MP K Vanlalvena'n Manipur buaina chungchang Parliament session-a sawi chhuahna hun remchang, adjournment motion put luh a tum chu an thlâwp thu an tarlang. Motion pu lut ngei tur leh theihtawp chhuah turin ZPM ṭhalaite chuan K Vanlalvena duhsakna an hlân a; Rajya Sabha MP-in adjournment motion put luh a tum chu thîk loa thláwp turin MNF party an ngen bawk.

Minister-in hmanpui

Mizo Upa Pawl, Lunglei Bazar Veng chuan nimin khan Saikuti Hall-ah an din champha vawi 47-na an lawm a, minister C Lalrinsanga'n a hmanpui. Minister hian Lunglei Kikawna RKVY hnuaia marketshed sak chu Lunglei Bazar Veng MUP-in a ṭul anga an hman atan a hlan a ni.KHAWTHLIR