NGO Chairman-in ṭangrual turin Mizo mipui a sáwm

Zo hnahthlakte tawrhpuina leh thlavâng hauhna kawngzawh nimina Mizoram hmun hrang hranga huaihawttu NGO Coordination Committee chairman R Lalngheta, Central YMA president chuan, Manipur buaina chinfel thuai a nih theih nan ṭangrual turin Mizo mipui a sáwm.

Nimina Aizawla kawng zawhnaah thu sawiin R Lalngheta chuan, "Sorkarin Manipur-a kan unaute buaina hi a chinfel thuai theih nan inpumkhatna ṭha tak nen ṭangrual ila, kan hnenah Pathian a awm a, ani'n min hruai ang a, hnehna kan chang ngei ang," a ti a; Manipur-a Zo hnahthlakte tawrhna chu a râpthlak tak zet a, Mizo zawng zawng rilru a nat thu leh an thinlung a rûm thu a sawi.

R Lalngheta chuan, Manipur sorkarin Mizote a veng him zo lo tih sawiin, "An in leh lo leh biak-inte an hâlsak a, nunna tam takin a tuar te, hmeichhe pawisawilo saruaka sawisak leh thah zui a nite hi hriatthiam har kan ti tak zet. Mizo mipuite'n enliam harsa kan ti a, ha chang kan ṭhial mek. India sorkar hian a rang thei ang berin he buaina hi a chinfel kan phût a ni," a ti.

Joint NGO Chairman chuan, India sorkarin a khua leh tuite ngei, sahimna zawnga Mizorama tlanchhiate ṭanpuina tur sum Mizoram sorkar a la pe lo chu hriatthiam har an tih thu a sawi a; inthliar hranna awm loa in leh lo kâng ral vek, an hâk lai nen chauha Mizorama tlanchhiate ṭanpuina a rang thei ang bera pe ngei turin an phût tih a sawi bawk.