Chief Minister puhna chungchangah dan lam thiamte ngaihdan ngaichâng

Lengpui Airport tihchang-tlunna hna thawh leh a kaihhnawih thilah Mizoram First Movement (MFM)-in dan bawhchhiaa chief minister Zoramthanga an puhna chungchangah Mizoram Lokayukta chuan dan lama mithiamte ngaihdan (legal opinion) an ngaichâng mek.

Mizoram Lokayukta aṭanga thu dawn danin, CM Zoramthanga puhna chungchang chhuitu Anti Corruption Bureau (ACB) report zir chian a nih hnuah dan lam thiamte ngaihdan lâk a ni. Dan lama mithiam an râwnte aṭangin ngaihdan an la dawng lo a, an dawn hunah Chief Minister puhna chungchang kalpui zel dan turah thutlukna siam a ni ang.

Tarlan tawh angin, ACB-in an chhuinaah hian Lengpui Airport tihchangtlun hnathawhnaah Chief Minister tih dik loh an hmu lo a ni.

MFM hian Lengpui Airport tihchangtlun hna (contract) inpek danah dan bawhchhiatna awm niin an ngai a, mawhphurtu bera an puh CM Zoramthanga chu finance leh audit lama mi thiamte chhui chiantir ngei turin April 11, 2022 khan Lokayukta-ah ngenna an thehlut a ni.

PWD enkawltu Chief Minister chu a thuneihna hmang sual leh chhungkhat laina duhsak uchuakah puhin MFM chuan, "India Danpui Article 14 a bawhchhiat avang te, General Financial Rules (GFR) 2017-a Rule 162 leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah ngenna kan thlen a ni," an ti.