Churachandpur-ah thil man a to; July 22 zan khan Meitei an lut
Manipur-a Zo hnahthlakte khawpui lian ber Churachandpur (Lamka) chuan ei leh in lama harsatna em em an tâwk lo a, thil man erawh a to thung. Hetih lai hian, July 22, 2023 zan khan Lamka-ah hian Meitei eng emaw zat an lut a, harsatna thleng loin an kîr leh.
Lamka aṭanga Vanglaini thu dawn danin, buaina a chhuah hnuah tun hmaa bungrua an lâk luhna ṭhin lam (Meitei area) aṭangin lak luh theih a ni tawh lo a, kawng thui zawk, Mizoram kaltlang zela lak luh a ngaih tawh avangin tun hma aiin mamawh chi hrang hrang man a to phah a ni.
Tun hma chuan Aizawl aia tlâwmin mamawh chi hrang hrang an lei thei a, tunah chuan Aizawl aia toin an lei a ngai tawh thung. Thingtlang lam, khaw tam takah phei chuan thil chi hrang hrang - ei leh bàr thlengin a harsa tih an sawi.
Kawlphetha leh tui chu tun hma ang thoin an hmu ṭha a, petrol leh diesel erawh petrol pump-ah a khát tâwk bakin lâk tur a awm lo. Eirawngbawlna gas pawh a tam ber chuan black-in an lei ṭhin.
Churachandpur/Lamka bikah chuan boruak a rálmuang a, ramri - Meitei leh Zo hnahthlakte awmna inrìna lamah chuan a khát tâwkin inkahna a awm ṭhin bawk.
Hetih lai hian, July 22, 2023 zan khan Meitei mi 300/400 vel chu Churachandpur-ah an lut a, Zo hnahthlakte pawh an inko khawm ve nghal a, ralthuam kengte pawh koh luh an ni. Hemi zan hian ruah a sûr nasa a, Meitei-te chu eng mah ti loin an kîr leh a, nimin thleng khan an lang zui leh tawh rih lo a ni.