Manipur buaina sawiho tura MP Vena ngenna a hlawhtling lo
Parliament fûr ṭhutkhawm neih mekah Manipur buaina chungchang sawiho dilna leh rawtna Rajya Sabha MP K Vanlalvena'n Rajya Sabha chairman Jagdeep Dhankar hnenah ṭum hnih a thehlut tawh a, mahse, a hlawhtling lo.
K Vanlalvena chuan, Parliament dan hman meka Rule 267 tlawhchhanin Parliament session kal lai titawp a, Manipur buaina leh thil thleng chungchang sawihona hun July 24, 2023-ah hawng tura ngenna July 21 khan Rajya Sabha Chairman hnena a thlen a; a ngenna hi a hlawhtlin loh avangin nimin khan ngenna a thlen nawn leh a ni.
Vanglaini palai zawhna chhangin MP K Vanlalvena chuan, a ngenna chu Rajya Sabha Chairman-in a tihlawhtling lo tih a sawi a, "Ka ngenna hmasa zawk a hlawhtlin loh avangin vawiin (Thawhlehni) khan ngenna ka thehlut leh a, a hlawhtling chuang lo. Manipur buaina sawiho hi an remti dawn lo niin a lang," a ti.
Rajya Sabha MP K Vanlalvena chuan, Manipur buaina sawiho a rem dawn loa a lan tâk avangin hmarchhak MP ṭhenkhat chuan Manipur buaina chu a kaihhnawih minister-in Parliament-a a sawifiah tal Parliament dan tlawhchhana an phût leh mek thu a sawi.
Manipur buaina sawiho phûtna a awm avang hian Parliament fûr ṭhutkhawm hi a kal tluang thei lo a, eptu lamte an au bengchhen ṭhin avangin inkhawm tihtawp lailâwk ṭhin a ni.