Joint NGO-in Governor hnenah Prime Minister lehkha tur an thehlut

NGO Coordination Committee (Joint NGO) chuan nimina kawngzawh tihtawp a nih hnuah Manipur buaina titawp tura prime minister Narendra Modi ngenna, Governor Dr Hari Babu Kambhampati hnenah an thehlut.

Governor hnena lehkha thehluh hi 'Prayer for Restoration of Peace and Harmony in Manipur' tih a ni a; Prime Minister hnena thawn chhàwn tur niin, Union Home minister Amit Shah leh Ministry of Home Affairs Secretary hnena thawn tur copy pek tel a ni bawk.

Joint NGO chuan an lehkhaah hian, Manipur-a buaina thleng mekte ngaihtuahin, remna leh muanna a thlen thuai a pawimawh bera an hriat thu an ziak a, buaina lian zawk a thlen loh nan buaina chingfel thuai turin an ngen a ni.

Manipur buaina vanga sahimna zawnga tlanchhia mi 12,000 chuang Mizoramah an awm mek thu leh chungte chu Mizoram sorkar leh pawl hrang hrangin an enkawl mek thu an ziak a; Prime Minister chu ram hotu lu ber a nih angin a tana thil pawimawh bik leh rang taka chinfel ngai nia an hriatte an ziah bakah, thil thlen tawh dan - mitthi leh hliam zat, in, biak-in leh bungraw chhe tawh zatte leh harsatna hrang hrangte an ziak bawk.

Prime Minister hnena thlen tur lehkhaah hian NGO Coordination Committee aiawhin chairman R Lalngheta (CYMA president) leh CYMA general secretary Lalnuntluanga bakah, MUP, MHIP, MZP leh MSU president ṭheuhin hming an ziak a ni.