Kawngzawhah ZCSC-in lawmthu an sawi

Zomi Council Steering Committee (ZCSC), Manipur chuan thuchhuah siamin, Manipur-a Zo hnahthlakte thlavang hauha nimina Mizoram hmun hrang hranga kawngzawh huaihawt a nih avangin an lawm thu leh an thlamuan phah thu an tarlang.

ZCSC chuan, "All NGO Coordination Committee hmalakna hnuaiah Mizoram chhung dâp chhuaka kawngzawhna ropui tak mai huaihawt leh buatsaih a ni a, thinlung leh tih tak zetin Mizorama Zo fate zawng zawng chungah lawmthu kan sawi mawlh mawlh a ni," an ti.

Buaina chhuah ṭan ni, May 3, 2023 aṭanga tun thlengin Mizoram sorkar, tlawmngai pawlte leh kohhrante'n Manipur-a Zo hnahthlakte thlavâng an hauh zel chu ropui an tih thu sawiin ZCSC chuan, "Manipur Zo fate kan thlamuang tak zet," an ti a, Pathianin kohhrante ṭawngṭaina a chháng ngeia an hriat thu an sawi.

ZCSC chuan, Zo hmeichhiate thiang­hlimna tibawlh­hlawhin an awm mek thu leh Meirapaibi, Meitei Leepun leh Aramhai Tenggol-te chetna rapthlak takin khawvel a déng chhuak tawh tih an sawi a; Manipur chief minister N Biren Singh chu Manipur-a Mizote thah chimihna tura kawng tinrenga hma laah puhin, an dem thu an tarlang.

Zo hnahthlakte'n rorelna hrang (separate administration) an hmuh theihna tura buaina chhuah tirh aṭanga tun thlenga an theihna zawng zawng chhuahtute chungah ZCSC chuan lawmthu an sawi rualin, a tàwp thlenga ṭang tlang zel turin an ngen a, "Manipur-a Zo fate inhumhimna tur leh rorelna hrang kan neih theihna turin hmalakna tluang taka kalpui kan duh tak zet a, Pathian hruaina kan mamawh avangin ṭawngṭaina nen kan zavaiin i ṭang tlâng ang u," an ti.