NQAS certification atan Aibawk PHC endik

Aibawk damdawi-in, primary health centre (PHC) chuan July 24-25 chhung khan endikna, national level external assessment an hmachhawn a; national external assessors pahnih Dr Arun Kumar Baruah leh Dr Debajyoti Bhattacharya ten an endik.

Sorkar damdawi-in ṭha tehna, NQAS certification leh chumi atana endikna hi National Health Mission hnuaia Quality Assurance Programme hmalakna a ni a; endiknaah hian department paruk - OPD, labour room, IPD, laboratory, NHM programme-te leh general administration-te endik a ni.

Aibawk PHC-in a huam chinah hian khua pariat awmin, mi 10,283 an cheng a, Health sub-centre panga leh health centre pathum a awm.

Aibawk damdawi-inah hian medical officer Dr Zoliankimi Ngente hoin staff nurse pali, pharmacist pakhat, health supervisor pakhat, laboratory technician pakhat, x-ray technician pakhat, group-D pathum, driver pakhat leh account manager pakhat an thawk mek a ni.