MNF leh Congress-in lawmthu an sawi

MNF leh Congress party-te chuan thuchhuah siamin, Mizoram hmun hrang hrangah nimina 'Zo hnahthlak unaute thlavang hauhna kawngzawh' huaihawt a ni chu lawmawm an tih thu an tarlang.

MNF party chuan kawngzawh chungchangah, "Mizo mipuite ṭanrualna hian Manipur sorkar leh India sorkar a auh eih ngei kan duhin kan beisei," an ti a, kawngzawhah chief minister leh MNF president Zoramthanga, deputy CM Tawnluia leh minister leh MLA dangte an tel thu an tarlang. "Zo fa hmun hrang hranga chêngte'n harsatna tâwka an inpui an rawn pan khawm mek lai hian, inpui nih zo taka Mizoramin tlin taka kan unaute kan lo dawnsawn dan hi lawmawm kan ti tak zet a ni," an ti.

Congress party chuan kawngzawh tihlawhtlingtute chungah lawmthu an sawi a; Mizo ram, hnam leh sakhua humhim tura theihtawpa ṭangho zel turin mipui an sáwm a, "Kawngzawha kal Mizoram mipui leh awmhmuna theihtawpa lo thláwptu zawng zawng chungah lawmthu kan sawi tak zet a ni," an ti. Manipur, Bangladesh leh Myanmar-a Zo hnahthlak harsatna tâwkte tan theihtawp an chhuah zel dawn thu an tarlang bawk.