Manipur chingfel thuai turin theihtawp chhuahin sorkar laipui kan nawr dawn - Chief Minister

Chief minister Zoramthanga chuan, Manipur tualchhung buaina chu sorkar laipuiin a chinfel thuai theih nan theihtawp chhuahin sorkar laipui an nawr dawn thu a sawi.

CM Zoramthanga hi nimina Aizawla Manipur Zo hnahthlakte thlavâng hauhna kawngzawhah a tel a; thuthar thehdarhtute zawhna chhángin, "Manipur Zo hnahthlakte hi kan unau, kan thisen zawmpuite an ni a, harsatna naménlo an tawh kan tawrhpuina leh an tan kan din tlatna kawngzawh hi a dik ka ti a, ṭha ka ti. Chuvangin, keini pawh phûr takin, hlawhtling taka a awm theih nan kan rawn tel a ni," a ti.

Chief Minister chuan, Mizoram sorkarin Mizorama Manipur ráltlante tan ṭanpuina pek zel a tum thu sawiin, "India sorkarin he buaina hi a chinfel theih nan kan theihtawpin sorkar laipui nawr a ni ang," a ti a; Mizoram sorkar angin tih theih an neih chuan mamawh chháng tura an inhuam reng thu a sawi.

Sahimna zawnga Manipur aṭanga Mizorama tlan lutte tana sorkar laipuiah ṭanpuina cheng nuai 1,000 a dil chungchangah Zoramthanga chuan, "Kawng chi tinrêngin kan theihtawpa nawr kan tum. India sorkar pawh hian a rawn tih kan ring a, a chhan chu a hlâwmpuia Manipur leh hmun dangah pawh ṭanpuina leh tun din chhohna hi tih an tum niin kan hria a, theihtawpa nawr kan tum," a ti.

CM Zoramthanga chuan, Manipur tualchhung buaina chinfel nan theihtawp chhuah an tum thu leh sorkar laipui pawhin hma a lak ngei an rin thu a sawi bawk.