Buaina chingfel vat turin kohhran hmingin ngen

Mizoram Kohhran Hruaitute Committee (MKHC) chairman Rev. Dr C Chawnghmingliana chuan, sorkar laipui leh Manipur sorkar chu muanawm taka Manipur buaina chingfel vat turin kohhrante hmingin a ngen.

Rev. Dr C Chawnghmingliana hian nimina Aizawla kawngzawh khârna inkhawmah hunserh a hmang a; thu sawiin, Manipur-a Zo hnahthlakte tawrhna rapthlak tak chuan hmun hrang hranga Mizote chu rilru leh ngaihtuahna hmun khat a puttir thu a sawi.

MKHC Chairman chuan, "Manipur buaina hi chi leh chi inkara buaina angin langsar mah se, a phênah Kristian nêkchêpna leh nuaibo duhna lian tak a inthukphûm a ni tih hai rual a ni lo. Biak-in thianghlim leh kohhrana thawktute chenna quarters 350 lai tihbawrhbân leh hal a ni a, meivâpah chantir a ni. Heng thil thlengte hian India ram danpuia Right to Freedom of Religion a kalh tlat a ni," a ti bawk.