KHAWTHLIR

PM-DevINE sawiho

Chief minister Zoramthanga kaihhruaiin nimin khan CMO conference hall-ah Prime Minister’s Development Initiative for North East Region (PM-DevINE) 2023-24 atana Mizorama hmalakna tur ruahmanna sawiho a ni. He hunah hian State Planning Board vice chairman H Rammawi, chief secretary Dr Renu Sharma, Planning secretary Lalmalsawma Pachuau leh sorkar hotu dangte an tel.

VC by-election

State Election Commission chuan nimin khan Hnahthial district-a Bualpui-V Village Council by-election neih hun tur a puang. Bualpui-V VC ṭhiah a nih avanga inthlan ṭhat hi August 22, 2023-ah neih a ni dawn a, zing dar 7 aṭanga tlai dar 5 thleng vote thlak hun hawn a ni ang a, vote thlak zawhah vote tlate chhiar nghal a ni ang. Inthlana chuh tuma hming pe turte tan August 1 thleng hun hawn a ni.

Press card hlan

Hnahthial district bawrhsap R Lalremsanga chuan nimin khan DC conference hall-ah Mizoram Journalist Association (MJA), Hnahthial district member paruk hnenah Press Accreditation Card a hlan. Bawrhsap chuan, thu dik zîktluak lo puan chhuahin harsatna tam tak a thlen theih thu sawiin, fimkhur taka thu chhuah ṭhin turin thuthar thehdarhtute a chah.

Kawng khâr dawn

Hauruang leh Tlabung inkar kawng (NH-302) chu BRN Infrastructure-in an thawm ṭhat dawn avangin vawiin zing dar 6 aṭanga July 28, 2023 zing dar 6 thleng khâr a nih dawn thu Lunglei district magistrate Ramdinliani'n a tarlang. Dam lohna, inthlan kaihhnawih duty leh phalna neite tan chauh zawh theih a nih thu a tarlang bawk.

Training buatsaih

Lunglei District Disaster Management Authority chuan nimin khan Lunglei Convention Centre Hall-ah Lunglei district-a Village Disaster Management Committee member-te tan training an buatsaih a, additional DC Donny Lalruatsanga'n a telpui.Thil pawimawh hrang hrang zirho a ni.