National Education Policy, 2020 angin 2035-ah state university neih ngei a ngai

Mizoram University leh Higher & Tech­nical Education (HTE) department hotute chuan, Mizorama college-te an kal zel theih nan kum 2035-ah chuan Mizoramin state university a neih ngei a ngaih dawn thu an sawi.

MZU registrar Prof. Lalnundanga chuan nimin khan MZU conference hall-ah thuthar thehdarhtute a kâwm a, MZU hotu dangte bakah HTE department hotute'n an ṭawiawm a; National Education Policy 2020 (NEP) chungchang thuthar thehdarhtute an hrilhfiah.

Prof. Lalnundanga chuan, India rama zirna kalphung chu NEP 2020 hmangin kum 2040-ah chuan thlak vek hman tum a nih thu a sawi a, "Kan college-te hi an survive dawn chuan state university neih ngei ngei a ngai. Kum 2035-ah chuan MZU-in college-te hi degree a pe thei tawh dawn lo a, state university aṭangin degree an neih a ngai tawh dawn," a ti.

NEP 2020-in a sawi anga kal turin university leh state sorkar an ṭan rual a ngaih thu sawiin, "NEP hi Mizoram Cabinet meeting-ahte hian sawi chhuak ve se, a chhan chu sum tam tak khawih thil a ni," a ti a; NEP hmathlir chu thlei bik nei loa mi zawng zawng huap, eng dinhmuna ding tan pawha zir theih zirna siam a nih thu a sawi.

NEP tihhlawhtlin a nih theih nan hian sorkar laipui leh state sorkarte chu GDP/GSDP aṭanga 6% tal zirna atan dah tura beisei an ni a, sorkar kum liam ta 2022-23 khan India ram pumah GDP aṭanga 2.9% chiah zirna atan dah a ni.

Hemi chungchangah hian HTE joint director (QAC) Lalṭanpuia chuan zawhna chhángin, Mizoramah chuan sorkar kum kal mekah School Education-ah chuan state GSDP aṭanga 4.56% leh HTE-ah chuan 0.73% dah anga an chhût thu a sawi.

HTE department-a NEP nodal officer Prof. B Lalrinsanga chuan, NEP-ah chuan stream pakhat chauh zirna college tihtawp tum a nih thu a sawi a, "Kum 2040-ah chuan higher education institution zirlai nei tlemte tihbo a, multi-disciplinary institution siam tum a ni," a ti a; stream pakhat chauh zirna college tihbo a, stream hrang hrang zir theihna college kalpui tum a nih thu leh zirlai pawh 3,000 chuang awm theihna tura siam tum a nih thu a sawi.

B Lalrinsanga chuan, NEP hnuaiah chuan deemed university ang chi tihbo tum a nih thu a sawi a; zirtirtu pawh college mal tan chauha lâk a, college danga sawn kual theih loh tura rawt a nih thu sawiin, "Zirtirtu transfer fo hian an thawhna college-ah neitu rilru an put theih loh phaha hriat vang a ni," a ti.

NEP 2020-ah hian thiamthil bik nei tura inzirtirna lam ngaih pawimawh a ni a; hemi chungchangah hian HTE Joint Director chuan, college-a second semester, third semester leh fourth semester-ah kalpui tum a nih thu leh, tuna college lut tharte 2nd semester an nih aṭangin kalpui tum a nih thu a sawi.

HTE department hotute sawi danin, NEP tihhlawhtlinna atan ruhrel ṭha zawk neih theihna turin sorkar laipuiah sum zawn a ni a; Pradhan matri Jan Vikas Karyakram (PMJVK) hnuaia zirna-in 17 dan project 19, NE Special Infrastructure Development SCheme (NESIDS) hnuaiah college pathum tan project pathum, North Eastern Council-ah college pahnih tan project pahnih leh Schemes for Special Assistance to State for Capital Investment (SASCI)-ah college pakhat tan project pakhat buaipui a ni.

Project an buaipui chungchanga zawhna chhángin HTE hotute chuan, detailed project report an la thehluh loh hlawm thu te, PMJVK hnuaia project an buaipui chu tunah chuan a hlawhtling dawn loa a lan thu te, NESIDS, NEC leh SASCI hnuaiah erawh beisei an neih san viau thute an sawi.

NEP RAWTNA MIZORAMA TIHHLAWHTLIN TAWHTE

▶ Semester system kum 2012 aṭangin hman a ni.

▶ Choice based credit system kum 2016-ah hman ṭan a ni a, UGC rawtna zulzuiin grade/credit system hman a ni tawh.

▶ College-ah academic and administrative audit hman a ni.

▶ College tinte Institutional Development Plan siamtir vek an ni.

▶ Faculty tihhmasawnna tur programme hrang hrang kalpui a ni.

▶ College ṭhenkhatin multi-disciplinary programme an nei tawh.

▶ Post graduate level-ah multi-disciplinary course kum 2021-22 aṭangin hman ṭan a ni.

▶ Kum 2021-22 aṭangin college pathumah post graduate zirna hawn a ni.

▶ Zirtirtu (faculty) indaih lohna phuhrûkna atan thawktu lak (direct recruitment) leh contract-a thawkte dah ngheh tih a ni bakah, temporary teacher lak a ni.

▶ Academic session 2023-24 aṭangin NEP Curriculum & Credit Framework for UG hman a ni.