Thu dik lo hmangin Lalduhoma'n beih a tâwk nasa - ZPM Media

ZPM Media & Publicity department chuan nimin khan Aizawl Press Club-ah thuthar thehdarhtute an kâwm a; ZPM leader Lalduhoma'n thu dik lo hmanga beih a tawh nasat thu an sawi.

ZPM Media general secretary Eddy Zosangliana Colney chuan, tun hnaiah ZPM leh an leader Lalduhoma ten beih an tâwk nasa niin a sawi a, "Kan Leader phei chuan min beihna zawng hi chu chhàn kher pawh a ṭul lo a tih bakah, party pawhin eng emaw chen chu en liam mai mai ang kan tih laiin, thu dik lo hmanga min bei fotute sim tawh turin kan ngen a ni," a ti.

Eddy Zosangliana chuan, beih an nihna chu âwih tâwk an awm ṭhin avanga insawifiah ve an nih thu sawiin, "ZPM chu intiṭha bik leh thianghlim bik anga insawi leh sorkarna chelh tawhte chhe lailet dêra sawiahte min puh. Party dang hruaitute leh sorkar kal tawhte hi tih ṭhat nei lo angin kan la sawi ngai lo," a ti a; an policy leh an kalpui dan an duhkhawp loh laite erawh an sawisel ṭhin tih a sawi.

Lalduhoma'n beih a tawh nasat chhan chu an huphurh êm vanga an ngaih thu sawiin ZPM GS chuan, "Tualthat àwm ang thawthángahte an puh. He thil phei hi chu kan ngai serious viau a, May 2023 daih tawh khan court-ah criminal complaint kan file. Mi pahnih man an ni tawh a, a phusa ber 'Tlangval U Hranga' inti, fake account erawh an la man lo. Duh aiin an chhui chhuak har tawh khawp mai," a ti.

Eddy Zosangliana chuan, June 27, 2023-a Lalduhoma an chhungkaw thila Guwahati-a a zin chungchangah mipui rilru hruai kâwi thei tur zawngin journalist lar tâk ṭhin, tun hnaia political party zawm tain a sawi thu a sawi a, "Hetianga rin thu leh thil hre chiang mang lo hmanga ZPM Leader a bei mai hi pawi kan ti hle," tiin, Lalduhoma puh a nihna chu dâwt a nihzia chiang taka sawi chhuah a nih tawh thu a sawi.

ZPM Media hotute chuan, dâwt hlanga an party leader Lalduhoma bei tawh lo turin mipui a ngen a, "An bei duh a nih pawhin thu dik, awmze nei leh awihawm deuh zawk hmang ve tawh turin kan chah a ni," an ti.

ZPM Leader beitu tharlám ber chu Congress party an nih thu sawiin ZPM Media hotute chuan, "Kan opposition nihpui an ni a, rorel lai party beih tur an awm reng laia an opposition-puite min bei hi an tho â nge, MNF dàwi-hlo hian a dáwi â tih pawh hriatthiam a har," an ti a; dàwi ât an nih chuan harh chhuak turin Congress party an ngen a ni.