Manipur-a hmeichhe dinhmun endik turin AMC councillor-te'n NCW hotu an ngen

Aizawl Municipal Corporation-a corporator/councillor hmeichhiate chuan National Commission for Women Chairperson chu Manipur buainaa tribal hmeichhiate chunga hleilenna a hmuna kala enfiah tur leh thil awm dan ngaihven turin an ngen.

AMC-a corporator hmeichhiate hian nimin khan NCW Chairperson hnenah Manipur-a hmeichhiate laka hleilenna a hmuna enfiah tura ngenna lehkha an thawn a; lehkha chu Mizoram Women Commission chairperson Lawmchhungi hnenah NCW Chairperson hnena a lo thawn chhàwn turin an pe a ni.

Corporator-te chuan, Manipur buainaa hmeichhe zahawmna tihbawrhbàn a ni ṭhin te, kutthlak, pawngsual leh thah hial an ni fo chu pawi an tih thu leh hriatthiam har an tih thu an ziak. Manipur-a hmeichhiate chunga hleilenna thleng ṭhin chu amah ngei Manipur-ah kal a, enfiah tur leh thil sual titute na taka hrem an nih theih nan hma la turin an ngen a ni.

Naga hmeichhia M Lucy, Narum khaw mi chu Meitei mipate'n an thah tâk chhungte hnenah Manipur sorkarin zangnadawmna cheng nuai 10 pek leh a fanu kum a tlin hunah sorkar hna pek a tiam tih tarlangin councillor-te chuan, Zo-Kuki hmeichhia, Meitei hoin an thahte pawh zangnadawmna Manipur sorkarin a pek theih nan hma la turin NCW Chairperson an ngen a; tun hnuah hmarchhak hmeichhiate humhim an nih theih nan hma la turin an ngen bawk.

AMC corporator hmeichhiate hian Manipur-a buaina chhuah ṭan ni, May 3, 2023-ah Imphal-a Kuki hmeichhe pahnih chu Meitei hoin an in aṭanga pawt chhuakin, an pawngsual hnuah an thah thu te, May 4-ah Kuki hmeichhe pahnih chu khawlaiah saruaka kawng zawhpui leh pawngsual an nih thu te, Imphal khawlaiah Kuki hmeichhe pakhat chu thah a nih thu te, Kongpokpi khuaa Kuki hmeichhe pakhat chu biak-ina a ṭawngṭai laiin thah a nih thute an tarlang a ni.