ASF vanga Mizorama vawk thi leh suat 70,875 a tling

Kumin 2023-ah district panga - Aizawl, Champhai, Kolasib, Mamit leh Lunglei district-ah vawk pùl hri, African Swine Fever (ASF) a lêng tih finfiah a ni tawh a, vawk 231 a thi tawh. Tun hnai ni 16 chhunga ASF kaihhnawiha vawk thi zat chu 113 a ni. Mizorama ASF lên tirh, kum 2021 aṭanga nimin thlengin ASF kaihhnawiha vawk thi leh suat zawng zawng 70,875 a tling.

AH&Vety department chhinchhiah danin, kumin 2023 bika ASF hmuh ṭan ni, May 5 aṭanga nimin thleng khan district pangaa khua/veng 17-ah ASF vangin vawk 231 a thi tawh a, vawk 274 suat a ni tawh. ASF vanga vawk thi zawng zawng (thi leh suat) chu 505 a ni.

District panga zingah Champhai district-ah ASF vanga vawk thi 123 awmin a tam ber a, vawk suat pawh Champhai district-ah hian a tam ber a, vawk 190 suat a ni tawh.

Kumin bikah tun thla, July 10 thleng khan ASF vangin vawk 199 thiin, vawk 193 suat a ni a, nimin thlen khan vawk 231 thiin, vawk 274 suat a ni a, vawk thi leh suat zat chu 392 a ni. Ni 16 chhungin vawk 32 a thi a, vawk 81 suat a ni tihna a ni a; ni 16 chhungin ASF kaihhnawihah vawk 113 a thi (thi leh suat) tihna a ni bawk.

Hetih lai hian, AH&Vety department data-a a lan danin, July 10, 2023 hnu lamah Kolasib leh Aizawl district-ah ASF hri lênnaa puan, vawk thi leh suat a awm tawh rih lo.

Mizoramah March 2021 khan Lunglei dis-trict-a Lungsen khuaah ASF a léng ṭan a; kum 2021 chhungin ASF vangin vawk 33,417 a thih bakah, vawk suat 12,568 a ni a, kum 2022 chhungin vawk 12,791 a thih bakah, vawk 11,594 suat a ni.

African Swine Fever vanga kum 2021-2023 chhunga Mizorama vawk thi zawng zawng chu 46,439 a tling tawh a, vawk 24,436 suat a ni tawh. ASF kaihhnawiha vawk thi/suat zawng zawng chu 70,875 a tling.