Manipur buaina sawiho phal loh vangin Eptu MDC-te'n rorelna-in an chhuahsan

Mara Autonomous District Council (MADC) fûr ṭhutkhawm chu July 25, Thawhlehni khan ṭan a ni a; Zo hnahthlakte tawrhpuina sawihona tur motion nimin khan House-a put luh chu Chairman-in a hnâwl avangin eptu MDC-ten session hall an chhuahsan.

MNF leh Congress party aṭanga member of district council (MDC)-te chuan an recess hall-ah thuthar thehdarhtute kâwmin, session hall an chhuahsan chhan an sawifiah nghal.

MNF Legislature Party leader Nahlo Solo chuan, Manipur-ah Zo hnahthlakte'n nasa taka an tawrh thu te, in leh lo chán a, biak-in tam tak tihchhiat leh râwng tak inthah leh insawisaka an awm mek thu te, Mizoram pumah tawrhpuina kawng zawh neih a nih thute a sawi a; chutih laia Manipur-a unaute tawrhpuina thu rei lo tê sawiho phûtna motion an put luh Chairman-in a hnawl chu pawi an tih thu a sawi a ni.

Motion put luh hi CCB Rules 34-na behchhana tih a ni a, Chairman thuneihna liau liau a nih thu sawiin Nahlo Solo chuan, "List of Business-ah a tel lo tih leh session ṭan hma ni hnih talah a luh hman a ngaih thu chhuanlama hmanga motion hi hnawl a ni. List of Business hi BAC siam a ni a, motion erawh chu eng lai pawha lut thei a ni. Chairman thuneihna a ni a, pawma pawm lo theitu a ni," a ti.

Nahlo Solo chuan, Manipur chu BJP sorkar a nih avang leh sorkar laipuiah BJP an sorkar bawk avangin MADC-a BJP sorkar chuan motion sawiho an duh lo nia an ngaih thu a sawi bawk.

MDC dangte pawhin motion an put luh chhan sawifiahin, "Manipur-a kan unaute tawrhpuina thu kan rorelna ngeia sawiho chu kan hnam leh MADC tan pawh thil ṭha tak a nih avanga rawt kan ni. Business dang pawh tibuai loa session ṭha taka kal chhunzawm mai tura kan beisei lai a, sawiho an phal loh avangin session-ah bill leh rule an thehluh pawh sawihopui tlakah kan ngai bik lo a, kan chhuahsan ta a ni," an ti.