Aizawlah Youth-20 Meet buatsaih a ni

Sports & Youth Services department leh Mizo Zirlai Pawl chuan nimin khan Vanapa Hall-ah 'Youth-20 Meet on Nationalism, Patriotism & Development' an buatsaih a, minister Lalruatkima'n hmanpuiin, Zo hnahthlak tawh phawt chu zái khata an luan a pawimawh thu a sawi.

Lalruatkima chuan, Y-20 Meet thupui chu Mizoram tan leh a chhunga chengte tan ṭha a tih thu leh tunlai boruak nen inhmeh a tih thu a sawi a, "Ram leh hnam hmangaihna rilru hi a dik lo zawnga kalpui theih a nih avangin kan ngaihtuahna a fìm a ṭul. Khawvelah hnam tam tak ram mumal nei loa an awm laiin keini chuan ram tia chhàl tur kan nei a, ram kan thlahtute'n lu chhum bán chhum huama an lo humhalh hi kan humhalh tlat tur a ni," a ti.

Khawvelah hnam tam tak an ral tawh tih sawiin Minister chuan, "Kan hnam leh ram hi ropui taka a dinchhuah theih nan ṭhalaite'n ram leh hnam hmangaihna rilru pu chunga theihtawp an chhuah a ngai. Mizo, Kuki, Chin, kan danglam chuang lo. Ramin rî nei mahse hnamin rî a nei lo a, Zo hnahthlak tawh phawt chu zai khata kan luan a pawi mawh tak zet," a ti a; intlanchhiatsan leh inhawisan theih a nih loh thu a sawi.

Lalruatkima chuan, hnam zahawm ni a, dingchhuak turin tam a ngai tih sawiin, "Mipate pawh innghahna tlak ni turin tun ai hian kan ṭan lehzual a ngai. Inchîmralna chi hrang hrang a awm a, chung zingah chuan population assimilation hi a hlauhawm ber. Inthlah pung tur leh ram leh hnam hmangaih turin zirtirna dik leh ṭhaa inkaihhruai a pawimawh," a ti.

Youth-20 Meet hi MZP vice president Andrew F Lalramnghaka'n a kaihruai a; MZP adviser Lalhruaitluanga Chawngte, NP-NCD state programme coordinator Dr Martin Chawngsailova, ICT informatics officer Lalengzuala leh Administrative Training Institute faculty Golda Dell Zohmangaihi ten thil pawimawh an zirtir a ni.