HFW in sak mek dinhmun thlirho

Health & Family Welfare minister Dr R Lalthangliana hoin nimin khan Secretariat conference hall-ah Health department hotute'n HFW department hnuaia in ṭhenkhat sak hna thawh mekte dinhmun an thlirho.

Health Minister chuan, kum hnih vel hripui lêng avangin hmasawnna ruhrel buatsaih leh in sak hna a khaihlak nia sawiin, "Hripui a kian hnuin department-in ṭan a khawh a, tunah chuan infrastructure lamah hma kan sawn a, building ṭhenkhat sak zawh tawh niin, a ṭhen peih ṭêp a ni," a ti a; HFW department hotute chu July thla chhungin theihtawp chhuaha a theih chin chin zo turin a chah.

Dr R Lalthangliana chuan, cheng vbc. 103 sênga sak Zoram Medical College academic building thar chu August 7, 2023-ah hawn a nih dawn thu leh hawngtu turin chief minister Zoramthanga sàwm a nih thu a sawi.

Ṭhutkhawmah hian Health secretary Esther Lalruatkimi, Directorate of Health Services leh Directorate of Hospital & Medical Education director te, National Health Mission mission director Dr Eric Zomawia, AYUSH directorate leh MSHCS hotute an tel a ni.