NH-54 kawngpuiah lirthei tlân phal a ni lo; Tlang kawngah truck tlân theih a ni

Lengpui Airport kawng, NH-54 chu kawng chung lam, Vaivakawnah lei min hlauhthawnawm a awm avangin mipui him zawkna turin lirthei tlân tlang phal a nih loh a nih thu Traffic SP Stephen Lalrinawma'n a tarlang.

Traffic SP chuan Kolasib SP nen inráwnin, NH-54 kawngpui khâr rih a nih dawn vanga lirthei liante Kawnpui-Aizawl via Durtlang kawngah an tlân a ngaih dawn avangin ruahmanna a siam nghal.

Traffic SP tarlan danin, Kawnpui-Aizawl via Durtlang kawng chu a zîm avang leh lirthei liante an tlân dawn avangin kawngpui dungah lirthei leh bungrua rêng rêng dah phal a ni lo. Lirthei lian (HMV), Kawnpui lam aṭanga Aizawl khawpui chhunga tlân lut turte tan luh theih hun pangngai a nih loh chuan Aizawl By-Pass Road-ah khawpui chhunga luh phal hun, zan dar 8 nghah tur a ni.

KAWNPUI-AIZAWL VIA DURTLANG

◆ Kawnpui lam aṭanga Aizawl pan tur lirthei lian (truck ke 10 aia tam lo)-te tan zing dar 6:30 aṭanga chawhnu dar 1 thleng tlân theih a ni.

◆ Aizawl lam aṭanga Kawnpui lam pan tur lirthei lian (truck ke 10 aia tam lo)-te tan zan dar 7 aṭanga a tûk zing dar 2 thleng tlân theih a ni.

◆ Lirthei lian (truck ke 12+)-te chu Kawnpui-Aizawl via Durtlang kawngah tlân phal a ni lo a; Sairang lam kawng (NH)-ah chauh kal tur a ni.

◆ Ke 12 leh a aia tam nei truck-te chu Sairang Sihhmui leh Ch Saprawnga Truck Terminal-ah lirthei tê zawkte nen bungrua an inhlan chhâwng thei ang.