Minister-in zirlai lawmpuina a hmanpui

Minister K Lalrinliana chuan nimin khan Mizo Students' Union, Pangbal-kawn leh Meidum branch-te'n an huam chhunga kumin HSLC leh HSSLC-a pass-te an lawmpuina inkhawm a hmanpui.

K Lalrinliana chuan, hlawhtling turin tum mumal neih a pawimawh thu a sawi a, "Zirna hi hmasawnna hmanraw pawimawh tak a nih avangin eng hna pawh hlawhtling taka thawk tur chuan zirna lamah thiamna chhawr tlak zir chhuah a pawimawh hmasa a, tih tak zeta zirna kalpui a ṭul," a ti.

Hmun hrang hranga awm Mizote buaina leh harsatna vangin Mizoramah an lut khawm mek tih sawiin Minister chuan, "Kan unaute an nih angin a ṭul anga chhawmdawl leh ṭanpui hi kan mawhphurhna a ni," a ti a; hnam ropui ni turin ṭanrual leh thawhho ṭhat a pawimawh thu a sawi.

Pangbalkawnah hian HSLC leh HSSLC pass tharte leh DIET-a Diploma in Elementary Education zir chhuak zirlai pali ṭheuh hnenah lawmpuina hlan a ni a; Meidumah HSLC pass paruk, HSSLC pass pali leh MA pass mi pakhat hnenah lawmpuina hlan a ni.