Kawngzawh chungchangah ITLF-te'n lawmthu an sawi

Indigenous Tribal Leaders' Forum (ITLF) chuan thuchhuah siamin, Manipur-a Zo hnahthlakte tawrhpuina leh thlavâng hauhna kawngzawh NGO Coordination Committee-in July 25, Thawhlehnia a huaihawt avangin thinlung taka an lawm thu an tarlang.

ITLF chuan, thla thum dáwn chhung chu Manipur-a Zo hnahthlakte Meitei hoin Manipur sorkar thlàwpna nen an bei tawh a, nunrâwng tak leh rapthlak takin tribal mite lakah an che a, hmeichhiate an tibawrhbáng tih an tarlang a, "Mizoramin min puih avang chauhin kan chhungkuate leh kan ramte venghim turin tun thlengin kan la ṭang thei a ni," an ti.

Buaina chhuah ṭan tirh aṭangin Mizoram sorkar, Centrak YMA, MUP, MHIP, MZP, MSU, kohhrante leh mipuite'n an tih theih apiang Manipur-a Zo hnahthlakte tan an tih thu tarlangin ITLF chuan, "Hei hian tun hma zawng aiin unau kan nihna a tinghetin a tichak a ni," an ti a; Mizoramin ṭanpuina thilpek chi hrang hrang leh ṭawngṭainate hmangin an puih nasat thu an tarlang.