Zo hnahthlakte thlavâng hauhna Mizoram University-ah lantir a ni

Nimin khan Mizoram University-ah Manipur-a Zo hnahthlakte thlavâng hauhna leh tawrhpuina hun hmang a ni a; kalkhawmte chuan resolution an siam nghal.

Punkhawm hi MZU Teachers’ Association (MIZUTA), MZU Non-Teaching Employees Association (MUNTSA) leh MZU Students’ Council (MZUSC) ṭangho huaihawt a ni a, MIZUTA president Prof. John Zothanzama'n a kaihruai. MIZUTA, MUNTSA, MZUSC bakah, MZU-a thawk Meitei aiawhten thu an sawi.

Manipur-a Zo hnahthlakte tawrhna ṭâwmpui nan minute khat chhung ngawi rengin an ding a; Manipur buaina leh thil thleng hrang hrangte chu an dem thu tarlangin, sorkar laipui leh Manipur sorkar chu buaina chingfel vat tur leh boruak muanawm a awm thuai theih nana hma la turin an phût a ni.

MZU-A PUNGKHAWM THUCHHUAK

* Sorkar laipui leh state sorkarin Manipur-a remna leh muanna a awm theih nan hma la thuai rawh se.

* Manipur buaina thlentu leh pawikhawihtute man chhuak a, dan anga an phu tâwk hremna pek ngei ni rawh se.

* Manipur mipuite chu buaina titawp a, chi leh hnam thliarna dah bo turin kan phût.