Lirtheiah mudguard vuah turin hriattir; Kuminah mudguard vuah lo 386 an man tawh

Aizawl Traffic police-te chuan kumin January-June chhungin lirtheia mudguard vuah lo 386 an man tawh. Traffic SP Stephen Lalrinawma chuan, lirtheia mudguard vuah lote chu vuah vek turin a hriattir a, thupek zâwm lote chu The Motor Vehicle (Amendment) Act, 2019 Section 179 hnuaiah hrem theih an nih thu a tarlang.

Traffic SP chuan mipui hriattirna chhuahin, fûr ruahtui tlâk lai a nih angin ruahsur lai leh a hnu lamah kawngpui a huh ṭhin tih a tarlang a, "Kawngpui a huh hian two wheeler, a bik takin motorcycle (bike) khalhtute zingah an lirthei ke vir aṭanga tui/chirh per lo dangtu mudguard thlawnte hian an hnunga mite tui, bawlhhlawh leh chirh an tihper ṭhin. MV Act, 1988 Section 52 chuan phalna nei loa lirthei nihphung tihdanglam a khap tlat a, Mizoram Motor Vehicles Rules, 1995 Section 170-in a sawi angin lirtheiah mudguard vuah tur a ni," a ti.

Traffic SP Stephen Lalrinawma hian lirthei, a bik takin bike neitu leh hmangtute chu mudguard thlawna lirthei khalhin mi dang tan harsatna a thlen thei tih hria a, mudguard vuah turin a hriattir a, mudguard thlawn tawhte pawh vuah vek turin a hriattir bawk.