MNYF-in Zoramthanga an chhuang

28th July, 2023

Mizo National Youth Front (MNYF) Headquarters chuan, tun hnaia Meitei hoin chief minister Zoramthanga lim an hâl chungchangah, "MNF president leh chief minister Pu Zoramthanga’n a mite a hmangaih vanga a tawrhna hi ropui kan tiin kan chhuang tak zet," an ti. Mizorama political party zingah MNF chu UCC duh loh thu a thlenna hmun tur dik taka thlen awm chhun nia an hriat thu an sawi bawk.

MNYF hruaitute chuan nimin khan Aizawl Press Club-ah thuthar thehdarhtute an kâwm a; July 26, 2023 khan Manipur khawpui Imphal-ah Meitei nu ho leh an ṭhalai pawl - Meira Paibis, Arambai Tenggol, Meitei Leepun nia hriatte'n CM Zoram-thanga lim leh thlalak hmun hrang hrangah an hâl a, nasa takin an diriam tih an tarlang.

MNYF vice presi-dent Zodinpuia chuan, Zoramthanga chu 'Kan chipui leh kan unaute tawrhna chu kan tawrhna a ni a, an tan ka theihtawp ka chhuahzel dawn' titu a nih thu sawiin, "Zo fate min kaihruai tura chakna a neih zel theih nan Zoram mipui pawh ṭawngṭainaa hre reng turin kan ngen a ni," a ti.

Zodinpuia chuan, "Inthlan dawn hnaiha vûng rawn chhuah ṭhin, rawng leh kalphung mumal nei lo eptu party pakhatin UCC chungchanga hmalakna mumal nei lo ang hiala MNF an rawn bei kha ram leh hnam veina tak tak an neih lohzia mipui hmaa an rawn inpuannaah kan ngai," a ti a; MNF chu Mizorama political party zingah Uniform Civil Code duh loh thu a thlenna tur dik tak, Law Commission of India hnena thlen awmchhun nia an hriat thu a sawi.

MNYF TARLAN ṬHENKHAT

◆ MNF din chhan pathum - Mizoramin zalenna sang ber neih a, Mizo hnahthlakte rorelna pakhat hnuaia awm; Kristian sakhua humhim; Mizo hnam tihhmasawn leh chawisan.

◆ MNF din chhan thuthlung hi kum 61 hnuah pawh nghet takin MNF-in a la vuan reng.

◆ Sakhua leh hnam nun khawih buai thei nia hriat avangin MNF-in UCC na takin a dodal.

◆ January 30, 2023-a MNF Legislature Party meeting-in Assembly House-ah Mizoramin UCC a duh loh thu leh dodalna pawm a nih theih nan hma a la.

◆ February 14, 2023-a Assembly session-ah UCC duh loh thu pawm a ni.

◆ MNF President-in July 4, 2023-ah Law Commission of India hnenah UCC chu India ram puma hman a duh loh thu ziakin a thlen.

◆ MNF adviser pahnih - Lok Sabha MP C Lalrosanga leh Rajya Sabha MP K Vanlalvena ten UCC nasa takin an dodal mek.