Aizawl-Lunglei kawng chhe lai siam thuai turin YMA-in sorkar an phût
YMA, Chhimphei Group chuan, an huam chhunga Hualngohmun khaw chhunga Aizawl-Lunglei kawngpui, leimin vanga hun rei tak chhe tawh chu siam ṭhatna tur sum kum 2022-ah pek a nih tawh avangin siam thuai turin sorkar an phût. Hetih lai hian, leiminna ṭhin leh kawngpui chhia chu July 26, Nilaini khan bialtu MLA Prof. F Lalnunmawia'n a tlawh.
Chhimphei Group YMA chuan July 26, 2023 khan thuchhuah siamin, Aizawl-Lunglei kawngpui chu Mizoram chhim lam panna leh State referral Hospital/ZMC panna kawngpui pawimawh a nih thu an tarlang a; Hualngohmun khuaa kawng chhia chu siam ṭha thuai tura sorkar/PWD an ngen a ni.
Kawng chhia siamna turin kum 2022-ah sum pek (sanction) a ni tawh tih tarlangin Chhimphei YMA chuan, "Kum 2022-ah sanction order a awm tawh laia vawiin thlenga siam loha a la awm hi hriatthiam har kan ti a. A rang thei ang bera siam turin Mizoram sorkar leh a changtu PWD-te kan ngen a ni," an ti. August 5, 2023 ral hmaa hmalakna an hmuh loh chuan a ṭul ang zela an bawhzui dawn thu an tarlang bawk.
Leiminna bula kawngpui chhe lai hi Hualngohmun khawtlang chuan naktuk Inrinni hian hnatlangin an thawm ṭha dawn a, chawhma dar 10 aṭanga tlai dar 4 inkarah kawngpui an khâr dawn tih an lo puang tawh a ni.
Aizawl South-III bialtu MLA Prof. F Lalnunmawia, PWD chief engineer (Highways) Vanlalmuana leh PWD engineer dangte chuan Hualngohmuna kawng chhe lai hi July 26 khan an enfiah a, kawngpuia tuihâwk luang leh chirhdiak vanga lirthei tana harsatna thleng mek sutkian dan tur an sawiho.
PWD hotute chuan, kawng chhe lai chu plain cement concrete (PCC)-a siam tum a ni a, fûr lai a nih avangin duh angin an siam hma thei lo niin an sawi a; mipui harsatna sukiang turin theihtawp chhuaha hmalak thuai an tum thu sawiin, fûr laia kawng diak leh bumboh lutuk tihziaawm nan lung (boulder) leh granular sub-base (rawra) phah tura hmalak nghal ni se an ti. Kawng chhe lai hêlna, Hualngohmun khaw chhung kawngpui tlahniam lai, lirthei tana kal harsa lai thawm ṭhat dan tur an sawiho bawk.