Vaivakawnah leimin vangin in a chim

Nimin chawhma dar 10:45 vel khan Vaivakawn Zohnuaia Vanlalkunga in chu a thlang leimin avangin ṭhenkhat a chim. Leimin hian kawngpui ṭhenkhat a pawt chim bawk.

June 16, 2023 khan Vaivakawnah hian lei a min a, leimin hian kawng thlang lama Hunthar Veng huam chhunga national highway chu hun eng emaw chen a hnawh bakah, chenna in pathuma chhungkaw 11 chu an inthiar chhuak a ni.

Leiminna hmun ngaiah July 4, 2023 khan min lehin, kawngpui a hnawh ping leh a; leimin hian a chhak kawngpui pawh a pawt chê a, chhungkaw pangain an chenna in an chhuahsan leh a ni.

Nimina chim ta Vanlalkunga te hi July 4-a lei a min leh ṭumin bungrua an thiar chhuak tawh a; Vanlalkunga te in bul chiaha a puzawnte in pawh dinhmun hlauhthawnawmah a ding mek.

Leimin hian kawngpui a pawt che nasa hle a, PWD lamin lei khuar lai hnawh ṭhin mah se, rei lo têah a khi leh ṭhin a, lei hi a khi zau telh telh a ni.