Mizoramin state university a neih nan hma kan la nghal - HTE Minister

Higher & Technical Education (HTE) minister Dr R Lalthangliana chuan, National Education Policy, 2020 leh Rashtriya Uchchatar Shiksha Abhiyan (RUSA) 3.0 phût angin Mizoramin state university a neih theih nan hma an la nghal niin a sawi.

HTE Minister hian J Thankima College-in NAAC accreditation A+ grade an hmuh nimina Vanapa Hall-a an lawmna a hmanpuinaah thu sawiin, "RUSA 3.0 leh NEP 2020 hnuaiah Mizorama college-te'n hamṭhatna an dawn theihte chu state university hnuaia awm an nih loh chuan an dawng thei tawh dawn lo a, hemi tur hian hma kan la nghal. Tun sorkar kal lai mek hian thla tam hun a neih tawh loh avangin thui tak a kal theih hmel loh a, amaherawhchu state university nei tur hian hma kan la nghal a ni," a ti.

Dr R Lalthangliana chuan, J Thankima College-in NAAC assessment grade C aṭanga grade A+ an hmu chu hlawhtlinna ropui a nih thu sawiin, "Awlsam taka chan mai theih a ni lo. Grade hrang hrang pali zuan khûm thei khawpa hma in sawnna leh in tumruhna hi a chhuanawm tak zet a, Mizoram tihmelṭhatu in ni," a ti a, hmasawn zel tura theihtawp chhuah turin a chah.

J Thankima College hian NAAC assessment vawi thum an hmachhawn tawh a, kum 2007-ah C++ leh kum 2016-ah C an hmu a, December 2022 khan A+ grade an hmu leh a ni. Endik hnuhnung bera an cumulative grade point average (CGPA) chu 3.37 a ni a, Mizoram sorkar enkawl college zinga CGPA sang ber a ni mek.

J Thankima College hi kum 1992-ah din a ni a, under graduate (arts) subject pasarih leh management (BBA) zirna a awm. Zirtirtu 41 leh office staff 14 bakah, zirlai 1,100 an awm mek a ni.