PUC-ah Youth-20 Meet buatsaih

Sports & Youth Services (SYS) department leh Mizo Zirlai Pawl (MZP) chuan nimin khan Pachhunga University College seminar hall-ah 'Youth-20 Meet on Nationalism, Patriotism & Development' an buatsaih a, SYS minister Robert Romawia Royte-in a hmanpui.

Robert Romawia Royte chuan, ṭhalaite'n ram leh hnam hmangaihna rilru an put a pawimawh thu a sawi a, "Mahni ram leh hnam ngaihsanna leh hmangaih nachâng kan hriat loh chuan hnam a boral thei. Nationalism ngaihtuaha kan ṭhanharh a pawimawh," a ti.

Manipur buaina chungchangah Minister chuan, "Hnam khat kan nihnain min phuar khawm a, an tawrhna kha kan tawrhna a ni a, he thil thleng hian hnam anga kan inpumkhatna a sawh nghet a ni," a ti a; MNF leh India inremna thuthlungin ram danpuiah Mizote tan inhumhimna a siam thu a sawi.

Youth-20 Meet-ah hian Mizoram University-a professor J Doungel, Informatics officer C Lalrinfela leh Social Welfare department aiawhin Vanlalhruaii leh MZP adviser Lalnunṭawma Fanai ten thupui an sawi a ni.