Zoawi Kût buatsaih a ni

Art & Culture department leh Mizo Zaimi Inzawmkhawm (MZI) Gen.Hqrs. chuan nimin khan Dawrpui Multipurpose Hall-ah Zoawi Kût an buatsaih a, Art & Culture minister R Lalzirliana'n a hawng.

Kûtah hian Mizoram leh hmarchhak state hrang hrang aṭangin hnam lâm an entir bakah, mimal zaithiam leh band ṭha tak takin hun an hmang a; vawiinah pawh chhunzawm tur niin, zan dar 9 thleng a duh apiang tan chhim theih a ni.

North Eastern Council (NEC) bultuma buatsaih Zoawi Kût hawnna inkhawmah hian hmarchhak state hrang hrangah remna leh muanna a awm zel an duhzia lantirna hun hman nghal a ni.

Zoawi Kût hawngtu minister R Lalzirliana chuan, hnam nun zia leh tih dan phungte chu hnam tin phuar khawmtu a nih thu a sawi a; zai leh làm chu Mizo hnam nuna bet tlat a nih thu sawiin, hmarchhak state hrang hrangte'n anmahni hnam làm leh zaite pho chhuah theihna Zoawi Kut buatsaih a ni chu ṭha a tih thu a sawi bawk.

Khualzahawm Dr Renu Sharma, chief secretary chuan, India ram pumah hnam làm leh rimawi hmangin inpumkhat leh zualna thleng zel se a duh thu a sawi.