Hna thawhnaa himna chungchang zirho

National Commission for Women (NCW) bultumin nimin khan Mizoram State Commission for Women leh Women and Child Development chuan Assembly Annexe conference hall-ah India hmarchhak huap, 'Safety for domestic employees and other' tih thupui zirhona an buatsaih a, minister Lalrinawma'n a hmanpui.

Zirhona hi MSCW chairperson Lallawmchhungi'n a kaihruai a; Assam, Arunachal Pradesh, Tripura, Nagaland leh Meghalaya aṭangin an state-a Women Commission aiawhte an tel.

Social Welfare & Tribal Affairs minister Lalrinawma chuan, hun inthlak danglam zelah hmeichhe tam takin eizawngin ni tin in an chhuahsan a ngai tih sawiin, "Hei hian thawh tur mamawh tam tak tan inhlawhna siam phah mah se, hmun ṭhenkhatah chuan dikna inrahbehsaknate a awm ṭhin," a ti.

DGP Anil Shukla pawhin thu sawiin, India rama domestic worker-te dinhmun leh harsatna tawhte a sawi a, "A ṭhen chu a ruaitute'n hlawh an pek ṭhat loh te, zing kar aṭanga zan rei tak tak inchhawr leh ei tur inpek ṭhat loh report-te a awm," a ti. Mizoramah agency rintlak loh kaltlanga state páwna hlawh ṭha tak hmuh theihna tura ṭhalaite thlêm chhuah hnua dinhmun khirh taka dingte an awm thu a sawi a, fimkhur tlân a pawimawh thu a sawi.

Zirhonaah hian Aizawl SP Rex Zarzoliana'n 'Human trafficking in Mizoram' tih thupui a sawi a; Aizawl additional district & sessions judge Gracy L Bawitlung, Mizoram University Economic department Prof. Lalhriatpuii, MZU Social Work associate professor Dr Henry Zodinliana leh FIWDC Peace Home director Ruth Zonunthari ten thupui dang an sawi bawk.