Chhimphei tlangdungah tlân chak lo turin mi tin an ngen

YMA, Chhimphei Group leh Aibawk RD Block VC Welfare-te chuan a hran ve vea thuchhuah siamin, an huam chhung kawngpui, Aizawl-Lunglei World Bank Road-ah chak lutuka tlân lo turin mi tin an ngen.

Aibawk RD Block VC Welfare chuan, Aibawk RD Block huam chhung, Hualngohmun-Sailam inkar kawngpuiah lirthei tlân chak vangin kawngpui âna cheng mi eng emaw zat an thih phah tawh niin an tarlang a; lirthei khalhtute leh mipui fimkhur turin an chah.

Aibawk RD Block VC Welfare chuan, "Khaw chhungah phei chuan danin a bituk aia chaka tlan lo tur leh kan tlangdung kawngpuiah bike-a rawn intlansiak tawh lo turin kan inngen a ni. Thu awih loh vanga harsatna tawk an awm a nih pawhin sawi buai theih a ni lo ang," an ti.

Chhimphei Group YMA pawhin an huam chhungah lirthei khalhtute fimkhur loh vanga thi eng emaw zat an awm tawh thu leh pawi an tih thu an tarlang a, "Lirthei khalhtute fimkhur turin kan ngen a, a bik takin two wheeler khalhtute he lai tlangdung khaw chhung bikah kawng dan min zahsak turin kan inngen a ni," tiin, darkar khata km. 20 aia chaka tlân lo turin mi tin an ngen.