AR insawn chhuah dan tur sawiho

Chief minister Zoramthanga kaihhruaiin nimin khan CMO conference hall-ah sorkar hotute'n Laldenga Cultural Centre sak hna ṭan thuai dan tur leh Assam Rifles-te Zokhawsanga an insawn chhuahna tura thil pawimawhte an sawiho.

Meeting-ah hian, Zokhawsang ram paltlanga loneitute kalkawng tur buatsaih ṭan a nih thu leh AR rama mimal ram neite chungchangah chak taka hmalak zel a nih thu tarlan a ni. Union Home Minister-in April 1, 2023-a a lung a phûm tawh Laldenga Cultural Centre hna bul ṭan thuai a nih theih dan tur leh sorkar laipui thuneitute nena indawr zui zel dan turte sawiho a ni bawk.

Ṭhutkhawmah hian deputy chief minister Tawnluia, Home minister Lalchamliana, Land Revenue & Settlement minister Lalruatkima leh sorkar hotu dangte an tel a ni.