KHAWTHLIR
Aizawl DC thar
Serchhip bawrhsap Nazuk Kumar chuan nimin khan a hna thar, Aizawl bawrhsap hna a zawm. Nazuk Kumar hian Aizawl DC mawhphurhna a lak hmain nimin zing khan Serchhip Kawnpui VC Hall thar a hawng a; hall hi sorkar leh mipui thawh khawm cheng nuai 61.46 sêngin Serchhip Kawnpui VC-in an sa a ni. Aizawl DC kal chhuak Dr Lalhriatzuali Ralte chuan nimin khan sorkara secretary hna a chelh ṭan bawk.
Leitan-Sihphir kawng hawng rih
Aizawl SP Rex Zarzoliana Vanchhawng chuan hriattirna chhuahin, Durtlang Leitan - Sihphir inkar kawng km. 10.25-a thui chu tun hnaia thawm ṭhat hna thawh a nih avanga hun eng emaw chen khâr tawh chu thu leh awm hma atan hawn a nih thu a tarlang.
Gutkha man
Aizawl District Anti Tobacco Squad leh Health Service hnuaia Food & Drugs Administration-te chuan July 26, Nilaini khan Zarkawt leh Electric Venga dawr liante zingah Gutkha leh a kaihhnawih thilte zuar an awm leh awm loh an endik a; dawr pariat aṭangin Gutkha fûn 2,427 an man. Mizoramah Gutkha zawrh khap a nih avangin hmun dangahte pawh an endik zel dawn tih an tarlang.
VC by-election
State Election Commission chuan Lai Autonomous District Council hnuaia village council pasariha general seat pasarih leh hmeichhe seat pakhat hnawh khahna tur by-election neih hun atan August 22, 2023 a ruat. Chuh tumte tan August 1, 2023 thleng hming pek luh theih a ni a, zing dar 7 aṭanga tlai dar 5 inkarah vote thlak a ni ang. Vote tlate chhiar nghal tur a ni a, vote thlak ṭhat ngai a awm chuan August 23, 2023-ah inthlan ṭhat tur a ni.
Pakhatna làwm
Saitual Hospital chuan damdawi-in fai inelna Kayakalp-a pakhatna an nih nimin khan Keifang Zawlbûkah an lawm a, bawrhsap Dr Lalngura Tlau-in a hmanpui. Saitual Hospital hi district hospital puitlinga chhiar a la nih loh avangin community health centre category-ah a awm a, Kayakalp-ah pakhatna niin, Rs 5,00,000 leh a ken tel dangte an dawn bakah, Eco friendly category-ah Rs 2,00,00 an dawng bawk.
MCS sîksâwi
Mizoram sorkar chuan MCS officer ṭhenkhat a sîksâwi a, UDPA/Home deputy secretary ni lai Chuauhnuna chu Hnahthial DC ni tura tih a ni a, Hnahthial DC R Lalremsanga chu Prison inspector general a ni ang. Prison inspector general Zarzokimi chu UDPA leh DMR-ah joint secretary ni tura ruat a ni.
In thiat
Bawngkawna F Vanlal-mana chenna in chu nimin khan a thlang leimin avanga dinhmun hlauhawma a awm avangin nimin khan Bawngkawn Local Coun-cil hmalaknain ṭhiah a ni. In ṭhiah hnatlangah hian mi eng emaw zat an thawk chhuak.
Virtual lab. hawng
SCERT-in Virtual Laboratory an bun thar chu nimin khan SCERT director Laldawngliani Chawngthu-in a hawng. Director chuan, Virtual Lab-ah zirlaite hriatthiamna ṭanpui thei tur 3D animation hmangin a tak ang thei ber tura thil tih a nih thu a sawi.
Graduation day
Mamit College chuan nimin khan Mamit Chhimveng YMA Hall-ah 'Freshers' Social & Graduation Day' an hmanga, bialtu MLA H Lalzirliana'n a hmanpui. MLA hian Mamit College Geography zirtirtute hlawh atan Rs 1,20,000, NCC hnenah Rs 30,000, college tan football, volleyball, basketball leh library-a dah tur lehkhabu eng emaw zat a hlan a ni. Mamit College hi April 1, 1983-ah din a ni a, zirlai 132, zirtirtu 31 leh thawktu dang pakua an awm mek.
Ziakmite Pholéng
T Vanlalhruaia (Sentei Pa) ziah, 'Ziakmite Pholéng' tih lehkhabu chu Assembly speaker Lalrinliana Sailo-in nimin khan MZP conference hall-ah a tlangzarh.
Thing phun
State Bank of India, Mamit Branch chuan Bank Day lawmna pualin nimin khan JNV, Mamit campus, NH-108 kawngpui kamah thing ṭiak an phun. Thing phun hnatlang hi Mamit SBI manager Lalramchhani Ralte-in a ho a, SBI-a thawkte leh JNV naupangte'n thing ṭiak 100 an phun a ni.