CSS hnuaia thawkte'n an thil phûtah sorkar aṭangin thu dawn an la nei lo

All Mizoram CSS Employees Coordination Committee (AMCECC) chuan Study Team on CSS rawtna tihhlawhtlin an phûtah sorkar aṭangin thu dawn an la nei lo.

AMCECC hian Study Team on CSS rawtna tihhlawhtlin phûtin June 26, 2023 khan hna an thawhnaah kal mah se, hna an thawk lo a; hemi ní vêk hian chief minister Zoramthanga nen an inbiaknaah, an thil phûtte July 2023 chhung ngeia tihhlawhtlin CM-in a tiam avangin nawrh an titàwp a ni.

Vanglaini zawhna chhangin AMCECC hruaitute chuan, an thil phût chungchangah sorkar aṭangain thu dawn an la neih loh thu an sawi a, "Kan sawi tawh angin, July 2023 thleng sorkar kan ngaichâng phawt ang," an ti.

Tarlan tawh angin, AMCECC hian an thil phût tihlawhtling tura sorkar nawr nan June 20-23, 2023 chhung khan badge dum belin hna an thawk a; awmzia a neih loh avangin ni thum awh turin June 26 aṭangin pen/tool down strike an kalpui bawk.

Chief Minister-in a sàwm angin AMCECC hruaitute chuan June 26 khan CM Zoramthanga chu a pisaah an hmu a; sorkara an phût - CSS hnuaia thawkte dah ngheh (regularise/absorb), medical reimbursement neih ve leh recruitment rules siam chungchangte an sawiho.

AMCECC tarlan danin, inbiaknaah hian Chief Minister chuan, regularisation/absorption scheme siam te, sorkar hna nghet lâkah CSS-a thawkte tan hmun hauh (reservation) siam leh, CSS-te tana recruitment rules siamte chu July 2023 chhung ngeiin Cabinet-ah ngaihtuah a, tihhlawhtlin ngei a nih tur thu a lo hrilh a ni.

AMCECC hruaitute chu June 26 khan Chanmari YMA Hall-ah an ṭhukhawm a; an thil phûtte Chief Minister-in tihhlawhtlin a tiam avangin pen/tool down strike an kalpui chu an titawp lailâwk tih tarlangin AMCECC chuan, "July thla chhung ngeia Chief Minister-in min tiamte hi Cabinet-in min pawmsak lo a nih chuan kan awm dan tur ngaihtuah ṭhat leh a ni ang," an ti.