Zo fate rorelna pakhat hnuaia awm tun thlengin India kan la nawr - Tawnluia

MNF senior vice president Tawnluia chuan, MNF leh India sorkarin inremna an ziah dawna an khel ber chu Zo hnahthlakte rorelna pakhat hnuaia awm niin a sawi a, "Tun thlengin India sorkar kan la nawr reng a ni," a ti.

Nimina Mizo Hnam Runah inkhawmah Tawnluia chuan, "MNF leh India inremna ziah a nih dawn khan Zo fate rorelna pakhat hnuaia awm hi kan khel ber a ni. Rei tak kan khelho hnuah state ramri tihdanglam chungchang hi Indian Constitution Article 3-ah tarlan a nih tho avangin inremna ziah a ni thei ta a," a ti a; Mizote rorelna pakhat hnuaia awm chu MNF Constitution-ah a inziah thu a sawi.

Tawnluia chuan, MNF chu 'Pathian leh kan ram tan' titu an nih avangin an danglam bik niin a sawi a, "Independent kan puan khan Zo fate chenna hmun zawng zawng a huam vek a, Zo hnahthlak tam tak ram leh hnam tan ke an pên chhuak a, mi tam takin nunna an chán nghe nghe. Zo fate hi pakhat kan nihzia a lang telh telh," a ti.

MNF Senior Vice President chuan, poli­tical party dangin hma­sawnna leh thil dang hrang hrang thiam taka an sawi lai pawhin MNF thupui ber chu nationalism a nia sawiin, "Hei hi kan danglam bikna a ni. Kan unaute tihduhdahna leh nêkchêpna, tawrhna hian kan mittui a titla a ni," a ti a; Zo hnahthlakte rorelna pakhat hnuaia an awm chu MNF-in an beisei reng a, MNF din tirh aṭanga champion-pui an tum reng a nih thu a sawi.