BJP nen thawhho kan tum lo - ZPM President

ZPM president Lalliansawta chuan, party hruaitu ṭhenkhatin ZPM chu BJP nena thawhho tum anga an puhna chu thu dik lo a nih thu sawiin, "Thawhho kan tum lo," a ti a; chîâi lo turin mipui a chah.

Lalliansawta hian nimin khan Tlangnuam community hall-a ZPM Aizawl South-II Block hruaitute intawhkhawmah thu sawiin, "BJP nena thawhho tum anga min puhna hi thu dik lo a nih avangin kan party mite lo chîâi lo turin ka chah a, thawhho kan tum lo a ni tih ka sawi chiang nghal a ni," a ti.

ZPM-in Uniform Civil Code (UCC) an duh lo tih sawiin Lalliansawta chuan, "Kan party-in kan duh lo a, a ṭha kan ti lo a, kan theih ang angin kan dodal zel dawn," a ti a; Manipur buainaa sorkar laipui a ngawi rei lutuk chu pawi an tih thu leh, Manipur buaina vanga harsatna tâwkte an theih ang angin pawisa leh thawmhnaw khawn khawmin an ṭanpui thu a sawi.

Lalliansawta chuan, Parliament-in Forest Conservation (Amendment) Bill, 2023 a pawm chu an dodal thu sawiin, "Hetiang dan an siam mai hi a pawi kan ti hle. He dan hi ZPM-in kan pawm thei lo a, a theih ang angin kan dodal dawn a ni," a ti.

ZPM President chuan, "ZPM hi Six Basic Needs tuipuitu te, budget-a thlai thar leina dah tuipuitu te, decen­tralisation tuipuitute, mi hrang hrang infin khawm kan ni. Buai tura min duhtute duhthusam thleng loa lungrual taka kan la kal thei hi Pathian min hruaina a ni a, tuna kan kal dan hi a la ṭha tâwk," a ti a; fimkhur taka an kal zel dawn thu a sawi.

Aizawl South-II bial MLA Lalchhuan­thanga pawhin thu sawiin, "Kan leader Pu Lalduhoma nasa takin beih a ni a, thu dik lo, rinthu nena hleihluak taka beih a ni reng. Pu Duhoma beih hi thil thar a nih loh avangin mipuiin ngaiah an nei tawh a, kan party-in a pun phah sauh zel a ni," a ti.