KV, Aizawl-in NEP 2020 an kalpui tawh

29th July, 2023

Kendriya Vidyalaya (KV), Aizawl hotute chuan, National Education Policy (NEP), 2020 angin an sikulah 5+3+3+4 system an kalpui tawh thu an sawi a; Mizoram leh Aizawl ngeiah pawh KV din belh theih a nih thu an sawi rualin, sorkarin a thlâwna ram a pek a ngaih thu an sawi bawk.

KV Aizawl hotute hian nimin khan an Library-ah thuthar thehdarhtute kâwmin, NEP 2020 an bawhzui dan leh tihhlawhtlin tawh dante an hrilh. Principal mawhphurhna la mektu Jeanie Zoremsiami chuan, NEP rawtna angin pawl 12 hnuai lama kal dan tur, 5+3+3+4 system an kalpui tawh thu sawiin, a bul ṭanna Balvatika an tih chu July 31, 2023 hian naupang kum 5-6 mi 40 hmangin an ṭan dawn thu a sawi.

Jeanie Zoremsiami chuan, KV-ah chuan pawl 1-10 inkarah Hindi zir ngei ngei a ngaih thu leh chu chu Mizo tam takin an sikul an duh chhan nia a lan thu sawiin, zirlai a thiam thiam an lâk loh thu a sawi a, "Keini chuan by-heart system kan duh lo. KV aṭanga zir chhuakte hi chu an zir zelna leh kal zelnaah an inringtâwk bik a, India ramah an zalen halh bik," a ti.

Mizoramah KV pali - Aizawl, Lunglei, Champhai leh Mizoram University-ah a awm mek thu sawiin Zoremsiami chuan, "Mamitah KV din tuma hmalak mek a ni. Khawpui lianah chuan KV pakhat aia tam din theih a ni a, Aizawlah pawh din theih a ni," a ti a, KV dinna turin sorkarin a thlâwnin ram a pek a ngaih thu a sawi.

Jeanie Zoremsiami sawi danin, KV Aizawl chu kum 1983-ah din a ni a, pawl 1 aṭanga pawl 12 zir theihna niin, arts leh science zirna a awm. June 2023 dinhmun angin, zirlai 1,045 awmin, mipa 551 leh hmeichhia 494 an ni a, zirtirtu 40 awm mekin, a ngheta thawk 22 leh contract-a thawk 18 an ni. Hostel an nei lo a, zirlaite chu mahni in aṭanga kal vek an ni a, school bus an nei lo. Commerce zirna neih tumin hma an la mek bawk.

KV, Mizoram University chungchang zawhna chhangin KV MZU principal Sreehari chuan, science zirna chauh an neih thu a sawi a, "Pawl 1 aṭanga pawl 12-ah zirlai 480 kan neih theih laiin zirlai 407 kan nei mek," a ti. KV MZU hi kum 2010-ah MZU sponsor-in din a ni.