Faina Hapta 2020 hawn a ni
October 2-9 chhunga kalpui tur Faina Hapta leh kumin chhunga kalpui tur khawpui fai inelna chu nimin khan Mizorama khawpui hrang hrangah hawn a ni a; Aizawlah chuan UDPA changtu deputy chief minister Tawnluia'n hawngin, intihsiaknaah Covid-19 dona atana sorkarin inkaihhruaina a zamte zawm ṭhat leh ṭhat loh endik tel a ni dawn tih a sawi.
Urban Development & Poverty Alleviation department buatsaih Cleanliness Week leh Mizoram Cleanliness Competition hawnna inkhawm hi Aijal Club-ah buatsaih a ni a; 'Sensitisation on Swach Survekshan 2021' a ni nghal bawk.
Dy, Chief Minister chuan, khawpui fai intihsiakna chu Census 2011-in notified town atana a puan khawpui 23-te tan a nih thu sawiin, zirna-in, sorkar pisa, damdawi-in, khua leh veng, khawlai, hotel, restaurant, bazar leh sumdawnna hmunte endik a ni dawn tih a sawi a, "He fai intihsiaknaah hian tunlai hripui léng mek do lêtna atana sorkar inkaihhruaina dan an zawm ṭhat leh ṭhat loh endik a ni dawn," a ti.
Tawnluia chuan, UDPA department-in ram hmasawnna turin kawng hrang hrangin hma a la mek tih sawiin, "UDPA hnuaiah directorate, SIPMIU, Smart City leh AMC kaltlangin Centrally sponsored scheme hrang hrang - AMRUT, HFA, NULM, SBM (Urban) bakah, SEDP leh PAHOSS-te a kalpui mek a ni," a ti a; UDPA-in khawpui tihchangtlun leh tihhmasawn kawngah theihtawp a chhuah thu a sawi.
Swachh Bharat Mission (Urban) chu Mizorama khawpui 23-ah faina leh thianghlimna kawnga hmasawnna thlentu a nih thu sawiin Tawnluia chuan, "Bawlhhlawh sâwngbâwl kawngah tehna thawh dan ṭha leh daih rei zawk min kawhhmuhtu leh vantlang inthiarna ṭha zawk kan neih theih nan a thawh hlawk hle," a ti.
Dy. CM sawi danin, Faina Hapta hi Mizoramah October 2, 1977-ah hman ṭan a ni a; hapta chhungin sorkar pisa, zirna-in, damdawi-in leh hmun hrang hrangah faina beihpui thlak a ni ṭhin. Kumina Faina Hapta hi khawpui 23 bikah chuan UDPA department-in a buaipui dawn a, a bak khaw dang zawngah chuan PHE department-in a buaipui dawn. ‘Swachhta Rankings’ pawh kalpui a ni ang.
Mizorama khawpui fai intihsiakna chu ram pum huap fai endikna Swachh Survekshan zûlzuia kalpui tur a nih thu sawiin Tawnluia chuan, "Mizoram chu páwna inthiar awm lohna, open defecation free (ODF) state kan nih vek tawh avangin kuminah chuan ODF Plus nih tumin hmalakna kalpui mek a ni," a ti.
Faina Hapta hawnna inkhawmah hian khualzahawm Lalruatkima, minister of state leh UDPA secretary Dr C Vanlalramsanga te pawhin thu an sawi. MLA pathum - Prof. F Lalnunmawia, C Lalmuanpuia leh Zothantluanga te, AMC mayor PC Lalhmingthanga leh deputy mayor Lalringliana leh, AMC councillor dangte pawh an tel a ni.