Covid-19: Mizoram dinhmun Hripui vei mi 31 hmuh belh

October 1, Ningania Mizorama swab sample 1,136 endik aṭangin Covid-19 vei mi 31 hmuh chhuah a ni a, mipa 29 leh hmeichhia pahnih niin, Covid-19 donaa hlawh nei loa thawk tura inpe hmeichhia pakhat a tel. Nimin khan mi 33 chhuahtir an ni.

Covid-19 vei Ninga­nia hmuh chhuahte chu - Lunglei, Champhai, Kolasib, Lawngtlai leh Mamit damdawi-ina TrueNAT laboratory hmanga hmuh chhuah mi 29 leh Rapid Antigen Test (RAT) hmanga district pahniha hmuh chhuah mi pahnih an ni a; Covid-19 symptom nei an awm lo. ZMC-ah hmuh chhuah a ni lo thung.

Ningania Covid-19 positive hmuh chhuah zinga hmeichhe pakhat, Kolasib district-a kum 21 mi chu Covid-19 donaa hlawh nei loa thawk tura inpe a ni a, hripui veite enkawlna covid care centre-a thawk mek a ni.

Nimin khan hripui vei zinga dam tawh mi 33 chhuahtir an ni a; Berawtlang CCC aṭangin mi panga, Lunglei Sazaikawn CCC aṭangin 18, Pukpui CCC aṭangin pakhat, Kolasib CCC aṭangin pahnih leh home isolation-a awm mi pasarih an ni.

Mizorama Covid-19 vei hmuh chhuah tawh zat mi 2,049 an ni a, mipa 1,686 leh hmeichhia 363 an ni. An zinga mi 1,754 (85.60%) an chhuak tawh a, enkawl mek mi 295 (14.40%) an awm. La chhuak lo zingah hripui an vei tawh lo an awm nual bawk.

Sorkar thuchhuah tarlan danin, October 1, Ningania TrueNAT-PCR hmanga Covid-19 positive hmuh chhuah zinga pasarih chu Lunglei Civil Hospital-a endik an ni a, an vaiin BSF sipai kum 24-31 inkar niin, tun hnaia state pawn aṭanga rawn lut, quarantine facility a awm lai an ni.

TrueNAT-PCR hmang vekin Champhai District Hospital-ah hripui vei Mizo mipa kum 20 mi, Assam Regiment sipai hmuh chhuah a ni a, tun hnaia Jammu & Kashmir aṭanga haw, khung hran lai a ni. 

Lawngtlai District Hospital-ah pawh Covid-19 vei mipa 15, kum 22-30 hmuh chhuah a ni a, BRO hnuaia labour vek niin, tun hnaia Mizorama rawn lut, quarantine centre-a awm mek an ni hlawm.

Mamit District Hospital-ah Covid-19 vei mipa pali leh hmeichhia pakhat hmuh chhuah a ni bawk a; mipate chu Power & Electricity department hnuaia hna thawk tura Tezpur, Assam aṭanga rawn lutte an ni. Hmeichhia chu Tripura aṭanga rawn haw, home quarantine-a awm lai a ni thung.

Ningani vêk khan RAT hmangin Lungleiah hripui vei pakhat, BSF sipai kum 51 mi hmuh a ni a, ani hi tun hnaia state pawna zin chhuahna nei lo a ni. RAT hmang vekin Mamitah mipa kum 36-a upa, JNV-a zirtirtu, tun hnaia Assam aṭanga rawn lut hmuh chhuah a ni bawk.

October 1 khan Mizoramah mi 1,136-te swab sample endik a ni a; ZMC laboratory-ah sample 235, TrueNAT-PCR hmangin district pariatah sample 122 leh, RAT hmangin district pariatah sample 779 endik a ni.