K Vanlalvena'n Rajasthan-ah Ruahtui khâwl dan a enfiah

Rajya Sabha MP K Vanlalvena chuan Sep­tember 30 leh October 1 khan Rajasthan khawpui Jodhpur leh a chhehvela ruahtui an khâwl dan a hmunah a enfiah.

K Vanlalvena hian September 26 khan Jal Shakti minister Gajendra Singh Shekhawat chu a pisaah a kâwm a, Chief Minister leh Dy. Chief Minister-te'n ruahtui khâwl chungchanga ruahmanna an neih tawhte a sawipui. Gajen­dra Singh chuan, an state (Rajasthan)-a ruahtui khâwl dan zir chiang turin a lo sáwm a, ruahmanna a siamsak a ni.

Jodhpur district-ah kum khatah ruahtui milimetre 370 vel chauh a tlâk ṭhin thu sawiin K Vanlalvena chuan, "Chuti chung chuan tláng chhîp sang laiah te, tlang pangahte ruahtui an khuap a, a thlitfimna tur hmunte siamin lei hnuaia a luan chhuahna turte an siam a ni," a ti a; in chunga ruahtui leh tuallaia ruahtuite dah khawl nan dîl ṭhahnem tak an siam thu a sawi.

Rajya Sabha MP chuan, Jodhpur mipuiin ruahtui khâwl khawm an ngaih pawimawh avangin tui in tur tlachham loin an awm thei tih a sawi a, "Mizoramah ruahtui mm. 2,500 aia tam kum tin a tlâk laiin ṭhálah tui a harsa ṭhin hi ruahtui khâwl khawmna kan neih ṭhat loh vang leh a nacháng kan hriat tâwk loh vang niin ka hria," a ti.