DCMA Minister-in ADC hotute a kâwm

District Council & Minority Affairs (DCMA) minister Robert Romawia Royte chuan Mizorama autonomous district council (ADC) pathumte'n anmahni inrêlbàwlna leh Mizoram sorkar nen an inkara harsatna awm ṭhinte chu chinfelpui a tum thu a sawi.

DCMA Minister hian nimin khan Secretariat conference hall-ah ADC pathum - Mara Autonomous District Council, Chakma Autonomous District Council leh Lai Autonomous District Council hotute a kâwm a; ADC-te chu Sixth Schedule hnuaia awm an nih angin an hamṭhatna leh chanvo turte department leh state sorkarin an ngaihtuahsak a pawimawh thu sawiin, "Mizoram sorkar, DCMA department leh ADC-te hian hmasawn turin lungrualna leh thawhhona ṭha an neih zel a ṭul," a ti.

ADC pathumte hnena Mizoram sorkarin budget aṭanga hlawh a pek bak hmasawnna hna thawhna tur sum a awm loh thu sawiin Minister chuan, hmasawnna ruhrel dinna atana hna thawhna tur project siam a, a theih ang anga sum zawn a rawt a ni.

Ṭhutkhawmah hian LADC chief executive member (CEM) V Zirsanga leh CADC CEM Rasik Mohan Chakma ten an huam chhunga sorkar hnathawk group A leh B post ruak hnawhkhahna tur lakah harsatna an tawh thu an sawi. RM Chakma chuan, ADC hnuaia thawktu, nihna inangte chu hlawhah pawh inang tlang se ṭha a tih thu a sawi bawk.