Court-in tualthattu a hrem

August 13, 2022-a Myanmar aṭanga rawn sumdawng Ngokhandova thattu, Hrangthanchea (38), Hnahthial, Falam district, Myanmar chu Champhai Addl District & Session judge Sylvie Z Ralte chuan dam chhunga táng tur leh Rs 15,000 chawi turin a hrem.

Hrangthanchea hi Myanmar buaina avanga Mizorama ráltlân, Khawbunga awm a ni a, Ngokhandova thingzai khawl chu kum 2022 khan Rs 35,000-in a leisak a, Rs 20,000 pe nghalin Rs 15,000 a bá a ni. Ba ṭhíng tura Hrangthanchea awmnaa Ngokhandova kal chu Hrangthanchea chuan tubohin a chhu hlum a, ruang chu an awmna thlang luikawrah a thukru a ni.

Hrangthanchea chuan a chêt dan chu hmutu an awma a hriat avangin Khawbung khawtlang hruaitute hnenah a inpe a, khawtlang hruaitute chuan Dungtlang police-te hnenah an hlan chhâwng.

Champhai District Court chuan Hrangthanchea chu thiam loh chantirin, July 27, Ningani khan hremna a puang a; rim taka hnathawk chunga dam chunga lung-ina táng tur leh Rs 10,000 chawi turin a hrem. Pawisa a chawi loh chuan thla hnih dang tàn belh turin a ti bawk.

Finfiahna tibo tura ruang a thuhrûk avangin kum thum chhung táng tur leh Rs 5,000 chawi turin a hrem bawk a; pawisa a chawi loh chuan thla hnih dang tàn belh turin a ti bawk a ni.