College Quiz-ah PUC an thiam ber

MZP Gen.Hqrs-in college zirlaite tana an buatsaih Inter College Quiz chu July 27, Ningani zan khan Ignite Studio-ah khâr a ni a, Pachhunga University College aṭanga tel F Remsangpuia leh Felicia Lalhmuchhuaki te pakhatna an ni.

Inter College Quiz-ah hian Ningani zan khan inelna tawp ber buatsaih a ni a, PUC, Hrangbana College leh Serchhip College an intihsiak. Inelna ṭan hmain khârna inkhawm buatsaih a ni a, Sports & Youth Services minister Robert Romawia Royte-in a hmanpui.

College Quiz-ah hian college 12 an tel a; pakhatna PUC-in Rs 40,000 an dawng. Pahnihna Hrangbana College-in Rs 30,000 an dawng a, pathumna Serchhip College-in Rs 20,000 an dawng a ni.

Quiz khârnaah hian minister Robert Romawia Royte chuan, quiz avangin zirlaite'n hriat thar tam tak an neih a beisei thu a sawi a, "Zirlaite hi thil hriat chian kawngah kan ṭhanharh a ngai a, kan hriatna hi original se kan duh. Kan thil hriatte mi sawia buai loin, kan thu lakna dik se, hmasawnna dik tak kan zawh thei dawn a ni," a ti.

MZP president Lalnunmawia Pautu chuan, zirlaite chu Mizo hnama chiang thar tur te, social media hman danah fimkhur tur te, hnam dang nupui/pasala nei lo turtein a chah a ni.