Minister-in Buyer-Seller Meet a hawng

Agriculture minister C Lalrinsanga chuan nimin khan Millennium Centre chung zawlah IFAD-FOCUS buatsaih Buyer-Seller Meet 2023 a hawng. Meet hi loneitute thlai thar leh ei tur siamte hralhna tur awlsam zawk dapna atana buatsaih a ni.

Agriculture Minister chuan, kut hnathawktute’n mumal zawka leitu nghet leh rintlak an neih theih nan Buyer-Seller Meet buatsaih a ni tih a sawi a, "Sik leh sa inthlak danglam karah kut hnathawktute sum lak luh a tam zawk nan kawng hrang hrangin hma kan la ṭhin a, hlawhtlinna a awm tawh rualin, hmabak a la awm," a ti.

C Lalrinsanga chuan, tlang ram loneih leh thlai bulfûk nei loa thlai chìn thlak rengin hlâwkna a tihniama a hria thu a sawi a; agriculture leh kut hnathawktute hmasawnna tura hmalakna hrang hrangte chu hlawhtling lehzuala siam turin project leh mission hrang hrangte a remchanna apiangah kal kawptir ṭha a tih thu a sawi bawk.

Buyer-Seller Meet-ah hian IFAD-FOCUS Mizoram project hnuaia farmer interest group (FIG)-te'n an thar chhuahte leh siam chhuahte an pho chhuak a ni.

IFAD-FOCUS Mizoram project hi Mizorama district paruk - Champhai, Kolasib Serchhip, Mamit, Khawzawl leh Saitualahte kalpui a ni a, district tinah FIG din a ni. FIG-te chu hlawm hrang hrangah ṭhen a ni a, hlawm pakhatah mi 15-30 vel zel an awm.

FIG-a hlawm ṭhen awm zat chu - jhum cultivation-ah 691, settled agriculture-ah 1,345, leiletah 527, landless-ah 251, CCA-ah 228 leh value chain-ah 224 a ni a; a vaiin FIG hlawm ṭhen 3,266 a awm a ni.