Britain palai leh CYMA inkâwm

Kolkata-a British deputy high commissioner Nick Low chuan nimin chawhma khan Central YMA Office a tlawh a, CYMA hruaitute nen an inkâwm.

Central YMA hruaitute chuan, Mizo ṭhalaite tana British Army-a luh theih dan tur te, doctor leh nurse-te leh kutkawih eizawnna lama tui Mizo ṭhalaite tan Britain rama hna an thawh theih dan turte an lo sawipui a; scheme hrang hrang hnuaia kalpui theih dante Nick Low chuan a hrilhfiah.

Nick Low chuan, Kolkata aṭanga a bial chin, India rama state 13-te tlawhin mipui leh pawlte a kawm kual thu a sawi a; YMA hmalaknate a lo hriat tawh thu sawiin, Mizo mipui tana YMA hnathawhte chu ropui a tih thu a sawi a ni.

British Deputy High Commissioner chuan, tualchhung buaina vanga Myanmar, Bangladesh leh Manipur aṭanga ráltlânte Mizoramin a lo dawnsawng ṭhin chu lawmawm a tih thu leh chumi lama YMA hmalaknate chu ropui a tih thu a sawi bawk.