Party mi nih loh vanga mi rethei ensan tihtawp kan duh - Lalduhoma

ZPM leader Lalduhoma chuan, ZPM-ah party president leh chief minister nih kawp a rem loh thu leh mahni party mi nih loh vanga mi rethei ensan ṭhin tihtawp an duh thu a sawi.

Lalduhoma hian July 27, Ningani khan East Tuipui constituency-a Farkawn leh Samthang khuaah vantlang inkhawm neiin thu a sawi a, "Party dangte tih dan ang loin collective leadership kan kalpui a, chief minister leh party president nih kawp a rem ve lo. Chief minister-in work department a chang dawn lo a, department dang zawng zawng a vil dawn a, a chak lo a dâwm kâng ang a, enpui ngai a enpui zel dawn a ni," a ti.

ZPM an sorkar chuan sorkar aṭanga hamṭhatna dawn tur awmte chu a phú leh mamawh tak takte'n an hmu dawn nia sawiin Lalduhoma chuan, "Party mi leh sa induhsakna hmanga inpek kan duh ve lo. Mahni party mi an nih loh vanga mi rethei ensan an ni ṭhin hi tihtawp kan duh," a ti a; economic nationalism an ngai pawimawh a, Mizorama Pathianin a sah sate an ngai pawimawh dawn thu a sawi.

ZPM candidate turte an puang tawh tih sawiin Duhoma chuan, "Kan ramin kan tawrh nasat em em eirûkna leh hlemhlêtna laka kan fihlim theih nan nasa takin kan infuih a, an fihlîm ngei pawh kan ring. ZPM hi danglam ngam turin kan inchah ṭhin a, eirûknaah an fihlîm ngei pawh kan ring," a ti.

ZPM Leader chuan, Mizoramin leibá a ngah tih sawiin, "Sorkarna kan chang a nih chuan kan inrenchem a ngai hle dawn. Lokayukta kan thuam chak dawn a, hna thawk theiin kan siam dawn a, rang takin eirûkna a tihreh kan beisei," a ti a; a hautak lo thei ang bera inrêlbâwl a ngaih dawn thu a sawi.

Farkawn leh Samthang khuaah hian ZPM zawm thar mi eng emaw zat Lalduhoma'n a lawm lut niin ZPM thuchhuah chuan a tarlang.