Cyber Crime PS-ah FIR 75 lut tawh
Aizawla Police Headquarters-ah May 22, 2020 khan Cyber Crime Police Station din a ni a, cyber crime kaihhnawihah first information report (FIR) 75 an dawng tawh a, chu'ng zingah chuan pawisa lama inbumna a tam ber.
Cyber Crime PS-a hotute chuan, phone call hmanga pawisaa inbumna thilah Mizote chu hnam dangin an zuam deuh nia an hriat thu sawiin, chutiang lamah chuan mipuite fimkhur turin an chah a; bank hotute pawhin rang taka anmahni hriattir thuai tura an duh thu an sawi.
Police hotute sawi danin, tun hnaia cyber crime kaihhnawih FIR an bawhzuinaah, Mizoram chhunga awm hnam dang pakhatin mi bumna lama bank a hman chu Mizoram chhunga bank a ni. Chu hnam dang chu Mizo ṭawngin a ṭawng thei viau a, mi pali/panga vel a bum tawh.
Bank passbook chungchangah Cyber Crime PS hotute chuan, “Bank passbook lei khâwl a, sum lama mi bum chíngte an awm a, thubuai kan bawhzui zingah passbook tam tak kawlte pawh an awm," an ti a; passbook hralh chu a tîra hralhtute'n pawisaa inbumna thil a awm hnuah thubuai an neih phah fo thu an sawi.
Bank hotute'n tun hnaiah chak taka hma an lâk thu sawiin police-te chuan, "Bank manager-te'n pawisaa inbumna vanga mi account khawih theih loha an siam emaw, rinhlelh zawng an neihin a rang thei angin min hriattir se kan duh," an ti.
Cyber Crime PS hotute chuan, mipat hmeichhiata lam hawi thubuai an dawng ṭhin tih sawiin, "Social media-a group ṭhenkhat chu zahmawh rawngkai tak tak hminga siam a ni a, hetiang group-ah hian mi ṭhenkhatin hmeichhe phone number an dah a, zahmawh rawngkaia an biak zui vanga hmeichhe lungawi lote'n FIR an thehluh a awm nual tawh," an ti a; Youtube-a account intihchhiatsak chungchangah thubuai an kawl thu leh chutiang chu ram páwn lam mite tih a nih an rin thute an sawi.
Hnam dangin foreign SIM card hmanga Mizote ngaizáwng dera bum chíng an awm tih sawiin police-te chuan, "Ngaizawngtu der lakah fimkhur a ṭul," an ti. Mi hmél siam chhiat (edit) hnua social media-a post chungchangah FIR an dawn tawh thu sawiin, "Instagram-a miin thil a post a, a delete tawh phei chuan chhui a harsa a, cyber crime tiharsatu a ni," an ti.
Cyber Crime PS hotute chuan, sumdawnna lama online hmanga inbumna a awm nual tawh tih sawiin, chutianga ti ṭhinte chuan social media-ah account siamin, phai lam nena inzawma bungraw chah a, a man thawn hnua reh leh ta daih an awm thu an sawi.
Social media-a thil zawrh chungchangah Cyber Crime PS hotute chuan, "Eng ang pawhin ṭha se, online-a pawisa thawn tura an rawn tih tawh chuan kan ipte chhunga pawisa an rawn zen ṭan tihna a ni a, fimkhur hle tur a ni," an ti.